8-dekabr – Ózbekstan Respublikası Konstituciyası qabıl etilgen kún múnásibeti menen bayram ilajı ótkeridi

Berdaq atındaǵı Qaraqalpaq mámleketlik universitetinde Ózbekstan Respublikası Konstituciyası  qabıl etilgenliginiń 33 jıllıǵı múnásibeti menen bayram ilajı bolıp ótti.

Onda Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov, Qaraqalpaqstan Respublikası sudı baslıǵı K.Tarixov, Qaraqalpaqstan Respublikası prokurorınıń orınbasarı E.Qayıpbergenov, professor-oqıtıwshılar,  student-jaslar qatnastı.

Ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.

Bunnan soń Joqarǵı Keńes Baslıǵınıń orınbasarı R.Nurazizov shıǵıp sóylep, jıynalǵanlardı Ózbekstan Respublikası Konstituciyasınıń  qabıl etilgenliginiń 33 jıllıǵı menen qutlıqladı.

Atap ótilgenindey, elimizdiń dúnya siyasiy maydanında ǵárezsiz mámleket sıpatında óz ornına iye bolıwı, rawajlanıw jolın belgilep, jıldan-jılǵa abırayınıń artıp barıwı, sonday-aq, xalıqtıń abadanlıǵın támiyinlewde – bas nızamımızdıń ornı hám áhmiyeti joqarı. Onda belgilengen tiykarǵı principler, hár bir puqaranıń huqıqları menen erkinliklerin támiyinlewdegi roli ayrıqsha.

Bayramǵa baǵıshlanǵan ilajlar orınlarda keń túrde dawam ettirilmekte.