Jańa zamanagóy tiptegi 400 orınlıq studentler turaq jayı paydalanıwǵa tapsırıldı

Usı jıldıń 5-dekabr kúni Berdaq atındaǵı Qaraqalpaq mámleketlik universitetinde jańadan qurılǵan studentler turaq jayınıń paydalanıwǵa tapsırılıwı múnásibeti menen ashılıw máresimi ótkerildi.

Onda Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov shıǵıp sóylep, sońǵı jılları elimizde jaslarǵa qaratılıp atırǵan ayrıqsha itibar mámleketlik siyasattıń baslı baǵdarlarınıń birine aylanǵanı haqqında keń túrde atap ótti hám jańa obekt paydalanıwǵa tapsırılıwı múnásibeti menen jıynalǵanlardı qutlıqladı.

Atap ótilgenindey, sońǵı jılları húrmetli Prezidentimizdiń basshılıǵında elimizde bilimlendiriw tarawına, sonıń ishinde jaslardı joqarı bilimge qamtıp alıwǵa ayrıqsha itibar qaratılıp, bul baǵdarda keń kólemli ilajlar ámelge asırılmaqta. Mine usınay iygilikli jumıslar qatarında joqarı oqıw orınları sanı artıp, hár jılı Qaraqalpaqstanlı jaslarǵa qosımsha kvotalar ajıratıp berilmekte. Bul óz náwbetinde, jaslarımız arasınan ozıq oylı, elimiz rawajlanıwına óziniń múnásip úlesin qosatuǵın jaslardıń jetilisip shıǵıwına bekkem tiykar bolıp xızmet etpekte.

Ulıwma 30,5 mlrd. sum qarjı menen mámleketlik-jeke sheriklik tiykarında qurılǵan jańa, barlıq qolaylıqlarǵa iye 400 orınǵa mólsherlengen studentler turaq jayınıń paydalanıwǵa tapsırılıwı mine usı baǵdardaǵı ilajlardıń ámeliy kórinisi esaplanadı. 

Álbette, paydalanıwǵa tapsırılǵan jańa obekt student-jaslar ushın uzaq jıllar dawamında xızmet etedi.