Ózbekstanda sonıń ishinde Qaraqalpaqstanda iri energetika quwatlıqları iske túsirildi hám gezektegileriniń qurılısı baslandı

Búgin húrmetli Prezidentimiz Shavkat Mirziyoyev basshılıǵında jańa energetika quwatlıqları hám infrastruktura obektlerin iske qosıw jáne gezektegileriniń qurılısın baslawǵa baǵıshlanǵan saltanatlı máresim ótkerildi. 

Onda Qaraózek rayonınan Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Qońırat rayonınan Minisrler Keńesiniń Baslıǵı F.Ermanov, keń jámiyetshilik wákilleri videobaylanıs arqalı qatnastı.

Jańa obektler - derlik 11 milliard dollarlıq 42 energiya islep shıǵarıw, saqlaw quwatlıqları hám basqa da infrastruktura obektleri - mámleketimizde ámelge asırılıp atırǵan milliy energetika tarmaǵınıń potencialın bekkemlewge qaratılǵan keń kólemli strategiyanıń bir bólegi bolıp esaplanadı.

Atap ótiw orınlı, búgin iske túsirilgen obektler qatarında Saudiya Arabstanınıń «ACWA Power» kompaniyası tárepinen elimizde ámelge asırılıp atırǵan «Samal elektr stanciyasın shólkemlestiriw» joybarınıń Qaraózek rayonı «Qoybaq» máhállesinde «Nókis-1» joybarı iske qosıldı.

Ulıwma bahası 107 mln.dollar, quwatlılıǵı 100 Megavatt bolǵan joybar sheńberinde hár biriniń quwatlılıǵı 6,5 Megavatt bolǵan 16 samal turbina generatorları qurılǵanı nátiyjesinde hár jılı 350 mln. kilovat/saat elektr energiyası islep shıǵarılıwına imkaniyat jaratıldı,  ortasha 100 mln. kub tábiiy gaz jumsalıwı tejeliwine, hawaǵa 180 mıń tonna karbonat andigrid gazı shıǵındılarınıń tarqalıwı kemeytiliwine erisildi.

Sonı ayrıqsha aytıw kerek, «ACWA Power» kompaniyası tárepinen Qaraqalpaqstanda ulıwma bahası derlik 8,6 mlrd. dollar bolǵan investiciya qarjıları esabınan jańa joybarlar ámelge asırılıwı belgilengen.

Sonday-aq, Qońırat rayonı studiyasınan ulıwma bahası  99,5 mln. dollar bolǵan 2 joybar iske túsirildi.

Atap aytqanda, «Ózbekneftgaz» AJ qarjıları esabınan joybar bahası 55,2 mln. dollar bolǵan «Neft hám gaz qazıp shıǵarıw hám qudıqlardı burǵılaw proceslerin sanlastırıw E-kan joybarı», sonday-aq, Buxara, Qashqadárya wálayatları  hám Qaraqalpaqstan Respublikasında «Ózbekneftgaz» AJ qarjıları esabınan joybar bahası 44,3 mln. dollar bolǵan «Akkumlyatorlı energiyanı saqlaw sisteması»n ornatıw joybarı iske túsirildi. 

Bunnan tısqarı, «Ózbekneftgaz» AJ qarjıları esabınan ulıwma bahası 100 mln. dollar bolǵan 2 joybardıń yaǵnıy, «Ústirt aymaǵındaǵı Tereńqudıq, Bayterek, Birqari, Xaray, Qulbay hám Qaraqalpaq bloklarında geologiya izlew jumısların ámelge asırıw» joybarı hám «Moynaq maydanı 2-sanlı izlew qudıǵın hám jańadan qurılatuǵın 10 km gaz tarmaǵın iske túsiriw» joybarlarınıń qurılıs jumıslarına start berildi.