Ózbekstan Respublikası Konstituciyası qabıl etilgeniniń 33 jıllıǵı keń túrde belgilendi

Usı jıldıń 6-dekabr kúni Berdaq atındaǵı Qaraqalpaq mámleketlik akademiyalıq muzıkalı teatrında Ózbekstan Respublikası Konstituciyası qabıl etilgen sánege arnalǵan bayram saltanatı bolıp ótti.

Dáslep Ózbekstan hám Qaraqalpaqstan Respublikalarınıń mámleketlik gimnleri jańladı.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev jıynalǵanlardı Ózbekstan Respublikası Konstituciyası qabıl etilgen kún múnásibeti menen qızǵın qutlıqladı.

Atap ótilgenindey, bıyılǵı bayram barlıq orınlarında kóterińki ruxta keń túrde belgilenbekte. 

Baslı Nızamımız tiykarında xalqımız elimizdiń rawajlanıwı jolında xızmet etiw menen birge, baxıtlı hám abadan keleshekke bekkem isenim menen qádem qoymaqta. Konstituciyamız jaratıp bergen imkaniyatlar tiykarında xalqımız erteńgi abadan turmıs jolında bir qatar tabıslarǵa, ekonomikamızdıń barlıq tarawlarında unamlı nátiyjelerge erispekte. 

Búgingi ótkerilgen bayram saltanatında mine usınday ámelge asırılıp atırǵan iygilikli jumıslar keń túrde atap ótildi. 

Bunnan soń bayram saltanatı qatarında xalqımızǵa órnek bolıp atırǵan «Eń úlgili kѳshe biyleri» tańlawı jeńimpazları múnásip xoshamatlenip, hár biri 20 million swmlıq vaucher menen sıylıqlandı.

Bayram ilajı kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.