Sporttıń Qol urısı túri boyınsha Qaraqalpaqstan Respublikası Joqarǵı Keńesi Baslıǵınıń kubogı bellesiwleri bolıp ótti

Búgingi kúnde jaslardıń bos waqıtların mazmunlı ótkeriw, olardı fizikalıq jaqtan shınıqqan kámil insan etip tárbiyalawǵa, dene tárbiya hám sporttı rawajlandırıwǵa ayrıqsha itibar qaratılıp kelinbekte.

Usı jıldıń 5-6-dekabr kúnleri Nókis qalasındaǵı 1-sanlı sport mektebinde (Manej)  huqıq-qorǵaw uyımları xızmetkerleri hámde Qol urısı federaciyasınan ózinde 100 den aslam sportshılardı qamtıǵan Qol urısı boyınsha Qaraqalpaqstan Respublikası Joqarǵı Keńesi Baslıǵınıń kubogı bellesiwleri bolıp ótti.

Búgingi ótkerilgen final bellesiwleri ashılıwına arnalǵan ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, qatnasıwshılarǵa áwmet tiledi.

Qızǵın básekige bay túrde ótkerilgen jarısta sportshılar ózleriniń sheberligin hám hár tárepleme shınıqqanlıǵın, ózleriniń kúshli tayarlıqlar menen kelgenligin kórsete aldı.

Keskin bellesiwler menen ótken jarıs juwmaǵında óz salmaq kategoriyası boyınsha jeńimpazlar qatarınan orın alǵan bir qatar jaslarǵa medal hám bahalı sawǵalar tapsırıldı.
  
Sonday-aq, jeńimpazlar Qaraqalpaqstan Respublikası Joqarǵı Keńesi Baslıǵınıń kubogı menen sıylıqlandı.