«Qara úy» YUNESKOnıń materiallıq emes mádeniy miyrasınıń REPREZENTATIV dizimine kirgizildi

Húrmetli Prezidentimizdiń Qaraqalpaqstan Respublikasına bolǵan saparında berilgen tapsırmalar sheńberinde qaraqalpaq xalqınıń ásirler dawamında jetip kelgen biybaha mádeniy miyrasların qásterlep saqlaw, onı jańa basqıshqa alıp shıǵıw hám dúnya kóleminde keńnen úgit-násiyatlawǵa ayrıqsha itibar qaratılıp, tapsırmalar berilgen edi.

Bul wazıypalardı keńnen engiziw maqsetinde Prezident Administraciyasınıń basshısı Saida Mirziyoyeva basshılıǵında jolǵa qoyılǵan sistemalı hám ámeliy jumıslar búgin óziniń unamlı natiyjesin berdi.

Xalqımızdıń dóretiwshilik mádeniyatı, turaq jay qurıw hám arxitekturalıq bilimlerin ózinde jámlegen «Qara úy» YUNESKOnıń materiallıq emes mádeniy miyrasınıń REPREZENTATIV dizimine kirgizildi.

Usı jıldıń 8-13-dekabr kúnleri Hindstannıń Nyu-Dehli qalasında UNESKOnıń materiallıq emes mádeniy miyras boyınsha húkimetler aralıq komitetiniń 20-sessiyası ótkerilip atır. 

Bul sessiya kóp milletli Qaraqalpaqstan xalqı ushın áhmiyetli waqıyalarǵa bay túrde ótkerilmekte. 

Sessiya jumısı sheńberinde dáslep, "Qobız soǵıw hám atqarıwshılıq óneri" YUNESKOnıń materiallıq emes mádeniy miyrasın jedel qorǵaw dizimine kirgizilgen bolsa, bunnan soń «Qırǵız, Qazaq hám Qaraqalpaq otawların qurıwǵa baylanıslı dástúriy bilim hám kónlikpeler» YUNESKOnıń materiallıq emes mádeniy miyrasınıń REPREZENTATIV dizimine kirgizildi.

Atap ótiw orınlı, «Qara úy» - qaraqalpaq xalqınıń dóretiwshilik mádeniyatı, turaq jay qurıw hám arxitekturalıq bilimleri jámlengen, áwladtan-áwladqa ótip kiyatırǵan mádeniy miyrası bolıp esaplanadı. Qara úy 6,8,12 qanatlı bolıp, basqa xalıqlar otawlarınan ajıralıp turadı. 

Álbette, UNESKO sessiya dawamında «Qobız soǵıw hám atqarıw óneri» sonıń menen birge qaraqalpaq xalqınıń «Qara úy»i YUNESKOnıń materiallıq emes mádeniy miyrasınıń REPREZENTATIV dizimine kirgizilgeni xalqımızdıń kewilin sheksiz quwanıshqa bólemekte.