Qaraqalpaqstan Respublikası Joqarǵı Keńesiniń segizinshi sessiyası haqqında málimleme

Usı jıldıń 12-dekabr kúni Qaraqalpaqstan Respublikası Joqarǵı Keńesiniń segizinshi sessiyası bolıp ótti. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı.

Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı.

Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı.

Sessiya «Qaraqalpaqstan» telekanalı arqalı tuwrıdan-tuwrı efirde jarıtıp barıldı.

Sessiyada dáslep, Joqarǵı Keńes Baslıǵı húrmetli Prezidentimizdiń baslaması hám qollap-quwatlawı menen hám Prezident Adminstraciyası baslıǵı Saida Shavkatovnanıń ámeliy háreketleri nátiyjesinde milliy qádiriyatlarımızdı ózinde jámlegen «Qobız soǵıw hám Jırawshılıq óneri» hám milliy miyraslarımızdıń saylandı úlgisi bolǵan «Qara úy» YuNESKOnıń materiallıq emes mádeniy miyras dizimine kirgizilgenin pútkil xalqımız úlken quwanısh hám maqtanısh penen kútip alǵanın ayrıqsha qanaatlanıwshılıq penen atap ótti. Sonday-aq, usı quwanıshlı waqıya múnásibeti menen pútkil xalqımızdı jáne bir márte qutlıqladı.

Bunnan soń, sessiyanıń kún tártibindegi máseleler qarap shıǵıldı.

Dáslepki másele «Reklama haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Byudjet, ekonomikalıq reformalar, investiciyalar hám innovaciya máseleleri komiteti baslıǵı Berdibek Seytnazarov bayanat jasadı.

Sessiyanıń kún tártibindegi dáslepki másele boyınsha qarar qabıl etildi.

Kún tártibindegi keyingi másele «Awıl xojalıǵı kooperativi haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Agrar, suw xojalıǵı, tábiyattı qorǵaw hám ekologiya máseleleri komiteti baslıǵı Anuarbek Jumanazarov bayanat jasadı.

Bul másele de tolıq qarap shıǵıldı hám deputatlar tárepinen qarar qabıl etildi.

Sessiya kún tártibindegi keyingi másele qalalıq jolawshılar transportı haqqındaǵı Qaraqalpaqstan Respublikası Nızamı hám tiyisli húkimetlik qararı talaplarınıń orınlanıwı boyınsha Qaraqalpaqstan Respublikası Transport ministrligine parlamentlik soraw jiberiw tuwralı bolıp, bul másele boyınsha Joqarǵı Keńestiń komitet baslıǵı Islambek Sdikov bayanat jasadı.

Bul másele deputatlar tárepinen qarap shıǵıldı hám qarar qabıl etildi.

Bunnan soń, Fizikalıq hám yuridikalıq shaxslardıń jer uchastkalarınan nızamsız ráwishte paydalanıw hám de xızmetkerlerdiń arasında korrupciyanıń aldın alıwǵa qaratılǵan jumıslar boyınsha Kadastr agentligi Qaraqalpaqstan Respublikası basqarmasına parlamentlik soraw jiberiw tuwralı másele boyınsha Joqarǵı Keńestiń Sud-huqıq máseleleri hám korrupciyaǵa qarsı gúresiw komiteti baslıǵı Alisher Atajanov bayanat jasadı.

Bul másele de tolıq qarap shıǵıldı hám deputatlar tárepinen qarar qabıl etildi.

Kún tártibindegi máseleler qatarında Qaraqalpaqstan Respublikası Joqarǵı Keńesiniń Byudjet, ekonomikalıq reformalar, investiciyalar hám innovaciya máseleleri komiteti tárepinen islenip atırǵan jumıslar haqqında Joqarǵı Keńestiń Byudjet, ekonomikalıq reformalar, investiciyalar hám innovaciya máseleleri komitetiniń málimlemesi tuwralı másele boyınsha Joqarǵı Keńestiń komitet baslıǵı Berdibek Seytnazarov bayanat jasadı hám bul másele de tolıq qarap shıǵılıp, deputatlar tárepinen qarar qabıl etildi.

Gezektegi másele boyınsha sessiyada 2030-jılǵa shekem Ózbekstan Respublikasında gender teńlikke erisiw strategiyasın 2025-jılı ámelge asırıw boyınsha kompleksli ilajlar baǵdarlamasında belgilengen wazıypalardıń orınlanıwı boyınsha Shańaraq hám hayal-qızlar komiteti baslıǵınıń málimlemesi tuwralı másele boyınsha Ministrler Keńesi Baslıǵınıń orınbasarı-Shańaraq hám hayal-qızlar komiteti baslıǵı Maryam Axmedova bayanat jasadı hám bul másele de deputatlar tárepinen qarap shıǵılıp, qarar qabıl etildi.

Bunnan soń kún tártibindegi keyingi másele boyınsha Ózbekstan Respublikasınıń 2024-jıl 5-avgusttaǵı Ózbasımshalıq penen iyelep alınǵan jer uchastkalarına hám olarda qurılǵan imaratlarǵa bolǵan huqıqlardı tán alıw haqqındaǵı 937-sanlı Nızamınıń Qaraqalpaqstan Respublikasında orınlanıw barısı haqqında Kadastr agentliginiń Qaraqalpaqstan Respublikası basqarması baslıǵı Isatay Tleuovtıń esabatı tıńlandı.

Bul másele de tolıq qarap shıǵılıp, qarar qabıl etildi.

Sessiya kún tártibinde ózbasımshalıq penen iyelep alınǵan jer uchastkasına bolǵan ijara huqıqı hámde olarda qurılǵan imaratlar menen obektlerge bolǵan múlk huqıqı tán alınıp atırǵan puqaralardıń dizimin sessiya qararı menen tastıyıqlaw máselesi qarap shıǵıldı.

Ózbekstan Respublikasınıń arnawlı Nızamın basshılıqqa alıp, wákillikli uyımlar tárepinen usınılǵan hújjetler hámde maǵlıwmatlar boyınsha, sonday-aq, Ádillik ministrliginiń huqıqlardı tán alıw tiykarlılıǵı haqqındaǵı juwmaqları inabatqa alınıp, ózbasımshalıq penen iyelep alınǵan jer uchastkasına bolǵan ijara huqıqı jánede olarda qurılǵan imaratlar menen obektlerge bolǵan múlk huqıqı tán alınıp atırǵan 1 mıń 172 puqaranıń dizimi sessiya qararı menen tastıyıqlandı.

Sessiya kún tártibinde «Qaraqalpaqstan Respublikası hákimshilik sudı baslıǵın saylaw haqqında»ǵı másele kórip shıǵıldı.

Eshimbetov Maxmud Urazboevich Qaraqalpaqstan Respublikası hákimshilik sudınıń baslıǵı lawazımına saylandı.

Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw haqqında bolıp, bul másele de tolıq qarap shıǵıldı.

Bunnan soń deputatlar tárepinen arnawlı qarar qabıl etildi.

Usınıń menen Qaraqalpaqstan Respublikası Joqarǵı Keńesiniń segizinshi sessiyası óz jumısın juwmaqladı.