Qaraqalpaqstannıń sawda-ekonomikalıq hám investiciyalıq potencialına baǵıshlanǵan dógerek sáwbeti bolıp ótti

Hindstannıń jetekshi sawda-sanaat palatalarınan biri - "PHD Chamber of Commerce and Industry" (PHD CCI) maydanında Ózbekstan elshixanası tárepinen mámleketimizdiń sawda-ekonomikalıq hám investiciyalıq imkaniyatlarına baǵıshlanǵan dógerek sáwbeti shólkemlestirildi.

Ilajda Hindstannıń 20 dan aslam jetekshi kompaniyalarınıń basshıları hám wákilleri qatnastı hám hind isbilermen toparlarınıń mámleketimiz bazarına qızıǵıwshılıǵı artıp atırǵanınan dárek berdi.

Prezentaciya dawamında diplomatiyalıq missiya wákilleri hám Nókisten kelgen ekspertler hindstanlı sheriklerdi Ózbekstanda sırt el investiciyaları ushın qolaylı ortalıq jaratıp atırǵan izbe-iz reformalar menen hár tárepleme tanıstırdı.

Dodalawlardıń oraylıq teması Qaraqalpaqstan Respublikasında isbilermenlik jumısın júrgiziw ushın usınılıp atırǵan siyrek ushırasatuǵın imkaniyatlar boldı.

Hindstan biznes jámiyetshiligi wákillerine Qaraqalpaqstanda sırt elli investorlar paydalanıwı múmkin bolǵan tiykarǵı abzallıqlar haqqında tolıq maǵlıwmat berildi. Atap aytqanda, Húrmetli Prezidentimiz tárepinen Qaraqalpaqstan Respublikası ushın jaratılǵan imkaniyatlar, qosımsha salıq hám bajıxana jeńilliklerin názerde tutatuǵın arnawlı huqıqıy rejim, tayar infrastrukturaǵa ie arnawlı ekonomikalıq zonalar hám sanaat parklerinde kárxanalar shólkemlestiriw imkaniyatları, jer ijarasınıń jeńilletilgen shártleri hám joybarlardı mámleket tárepinen hár tárepleme qollap-quwatlaw, sonıń ishinde, investiciyalardı qorǵaw kepillikleri haqqında sóz boldı.

Birgeliktegi joybarlardı ámelge asırıw ushın perspektivalı baǵdarlar sıpatında toqımashılıq sanaatı, farmacevtika hám medicina úskenelerin islep shıǵarıw, málimleme texnologiyaları hám aucorsing, ximiya sanaatı, "jasıl" energetika hám turizm tarawları belgilep alındı.