Qaraqalpaqstanda Hindistannıń ERA universiteti filialın shólkemlestiriw máseleleri kórip shıǵıldı

Jaqında Qaraqalpaqstan Respublikası Joqarǵı Keńesiniń komitet baslıǵı M.Atamuratov, Mádeniyat ministri B.Temirbaev hám Ózbekstan Respublikasınıń Hindstandaǵı elshixanasınıń konsulı B.Asqarovlar Hindstannıń Uttar-Pradesh shtatınıń Laknau qalasına ámeliy sapar menen barıp, «ERA University» basshıları menen rásmiy ushırasıw ótkerdi.

Ushırasıwda universitettiń bilimlendiriw, ilimiy hám infrastrukturalıq potencialı tanıstırılıp, Qaraqalpaqstan Respublikası menen uzaq múddetli birge islesiwdi jolǵa qoyıw boyınsha pikirlesildi.

Sonday-aq, jaqın qatnasıqlardı ornatıw baǵdarında Qaraqalpaqstanda ERA universitetiniń filialın ashıw máselesi kórip shıǵılıp, bul joybardı ámelge asırıw baǵdarında universitet delegaciyasınıń respublikamızǵa ámeliy saparın shólkemlestiriw boyınsha kelisip alındı.

Ótkerilgen ushırasıw dawamında medicina, farmacevtika hám ilimiy izertlewler baǵdarlarında birge islesiw perspektivaları, jaqın múnásibetlerdi ornatıw hám bekkemlew máseleleri talqılandı.