Belsendi hayal-qızlarǵa «Itibar-2025» sıylıǵı tapsırıldı

Búgin Qaraqalpaq mámleketlik jas tamashagóyler teatrında «Itibar-2025» sıylıǵın tapsırıwǵa arnalǵan saltanatlı ilaj ótkerildi. 

Onda Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov shıǵıp sóylep, jıynalǵanlardı qutlıqladı. Atap ótilgenindey, búgingi kúnde elimizde hayal-qızlarǵa degen itibar mámleketlik siyasat dárejesine kóterilgen bolıp, usı tiykarda olardıń jámiyetlik-siyasiy turmısımızda belsendiligi artıp, barlıq tarawlarda joqarı nátiyjelerge erisip kelmekte. Sonı da ayrıqsha aytıw kerek, sońǵı jılları húrmetli Prezidentimizdiń ayrıqsha itibarı menen hayal-qızlardı qollap-quwatlaw boyınsha ilajlar dawam ettirilip, olardıń bántligin támiyinlew, isbilermenlikke tartıw baǵdarında kóplegen jeńillikler berilmekte, ásirese, sociallıq qorǵawǵa mútáj hayal-qızlarımız materiallıq hám ruwxıy jaqtan qollap-quwatlanıp atır. 

Búgingi ótkerilgen ilajda elimizdiń sociallıq-ekonomikalıq hám jámiyetlik-siyasiy turmısında belsendilik kórsetken, xalqımızdıń abadan turmısın támiyinlew jolında nátiyjeli jumıs alıp barıp atırǵan hayal-qızlarımızdıń xızmetleri bahalanıp, olarǵa «Itibar-2025» sıylıǵı tapsırıldı. 

Sonday-aq, «Jıl hayalı», «Gender teńlik belsendisi» hám «Jıldıń eń jaqsı hayal-qızlar belsendisi» tańlawlarınıń Qaraqalpaqstan Respublikası basqıshınıń jeńimpazları sıylıqlandı.