Awıl xojalıǵı xızmetkerleri kúni» bayramı múnásibeti menen bayram tamashaları ótkerildi

Prezidentimizdiń baslaması menen hár jılı dekabr ayında elimizde Awıl xojalıǵı xızmetkerleri kúni keń túrde belgilenip atır. Búgin Nókis qalasınıń arqa tárepindegi Atshabar maydanında Awıl xojalıǵı xızmetkerleri kúnine baǵıshlanıp saltanatlı bayram tamashaları bolıp ótti. 

Ilajdıń ashılıw saltanatında Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı Awıl xojalıǵı xızmetkerleri kúni bayramı menen qutlıqladı. 

Joqarǵı Keńes Baslıǵı óz sózinde búgingi kúnde elimizde awıl xojalıǵın modernizaciyalaw, tarawda jańa texnika hám innovaciyalıq texnologiyalardı engiziw, jer-suw resurslarınan nátiyjeli paydalanıwdı en jaydırıw, xalıqtı sapalı azıq-awqat ónimleri menen támiyinlew, fermer hám klasterlerdi qollap-quwatlaw boyınsha alıp barılıp atırǵan keń kólemli jumıslarǵa toqtap ótti. Sonday-aq, húrmetli Prezidentimiz tárepinen tek ǵana Qaraqalpaqstan ushın qabıl etilgen qarar hám pármanlar tiykarında xalqımızdıń abadan turmısın támiyinlew boyınsha oǵada kólemli jumıslar ámelge asırılıp atırǵanlıǵına ayrıqsha toqtaldı.

Bayram ilajına Qaraqalpaqstan Respublikası Ministrler Keńesiniń Baslıǵı F.Ermanov qatnastı.

Búgingi bayram saltanatında elimizde agrar salasında jemisli jumıs alıp barıp atırǵan bir qatar miynet aldınǵıları xoshametlendi.

Eń aldıńǵı fermer xojalıǵı nominaciyasına «Urkinbay» f/x baslıǵı Nugmanov Aytbay ılayıq dep tabıldı hám Prezidentimiz sawǵası Traktor tapsırıldı.

Sonday-aq, eń jaqsı baǵman nominaciyası boyınsha «Ozod intensiv bog’» f/x baslıǵı Masharipov Ozod Kishi traktor, Eń jaqsı sharwa fermer nominaciyası boyınsha: «Dadabay Bayramkilich» f/x baslıǵı Dadebaev Azamat motoroller menen sıylıqlandı.

Bunnan tısqarı, Eń jaqsı tawıq baǵıwshı, Eń jaqsı balıqshı nominaciyası jeńimpazları granulyator,  Eń jaqsı pal hárre baǵıwshılar, Eń jaqsı pillekesh, Eń jaqsı mexanizator, Eń jaqsı eksportyor, Eń jaqsı paxtakesh, Eń jaqsı ǵállekesh, Eń jaqsı kombayınshılarǵa xolodilnik, 
Eń jaqsı qarakólshilik xojalıǵı, Eń jaqsı irrigator, Eń jaqsı meliorator, Eń jaqsı veterinar, Eń jaqsı ósimliklerdi qorǵawshı laborantlar hár biri skuter, Eń jaqsı ıssıxanashı, Eń jaqsı palızshı, eń jaqsı baw-baqsha jetistiriwshi, Eń jaqsı kartoshkashı, Eń jaqsı qıytaq jer iyelerine hár birine Moto kultivator, Eń jaqsı awıl xojalıǵı ilimpazına televizor, Eń jaqsı awıl xojalıǵı innovatorına noutbuk tapsırıldı.

Bunnan soń bayram tamashaları xalıq oyınları hám milliy sport oyınları menen dawam etti.

Dáslep, arqan tartısıw bellesiwleri baslandı.

Onda Shımbay rayonı birinshi, Nókis rayonı ekinshi, Moynaq rayonınıń komandası úshinshi orınlardı iyeledi.

Qoshqarlar urısı oyınları da tamashagóylerde úlken qızıǵıwshılıq oyattı. Onda hár bir jeńip shıqqan qoshqarlardıń iyelerine bahalı sawǵalar tapsırıldı. Yaǵnıy: birinshi orındı iyelegen qoshqarlarǵa gibrit motoroller, keyingi orınǵa elektromotoroller, bunnan basqa qoshqar iyeleri skuter hám basqa da bahalı sawǵalar menen sıylıqlandı.

Bayram qatnasıwshılarınıń itibarı qurǵa qaratıldı. Bas bayraq ushın ortada Nókis rayonınan Zaxiriddiyin Zaytov hám Nókis qalasınan Babajanov Jaloliddin bellesti. Bir-birine múnásip palwanlar bellesiwinde Zaxiriddiyin Zaytov jeńiske eristi. Qaraqalpaqstan Respublikası Joqarǵı Keńesiniń Baslıǵı Amanbay Orınbaev palwanǵa bas bayraq – Prezidentimizdiń sawǵası 40 mln. sum sıylıqtı tapsırdı.

2-orın iyesi J.Babajanov– 30 mln sum, 3-orın iyeleri S.Matkarimov 20 mln sum hám R.Kudanov xolodilnik penen sıylıqlandı.

+83 kg salmaq kategoriyasında B. Orınbasarov hám D.Tórebaevlar xolodilnik penen sıylıqlandı. Bunnan tısqarı, 66, 73, 81 kg salmaq kategoriyasındaǵı palwanlar da múnásip xoshametlendi.

Bunnan soń bir, úsh, bes, bes aylaw (jorǵa), jeti, on aylawǵa atlar jiberildi. Onda respublikamızdıń barlıq rayonlarınan kelgen sheber shabandozlar shólkemlestiriwshiler tárepinen qoyılǵan bahalı sawǵalar ushın báygige tústi.

On aylawǵa at shabısı bársheniń dıqqat itibarında bolıp, báygige birinshi bolıp kelgen Moynaq rayonınan Sarsen Talasovtıń atı bas bayraqtı qolǵa kirgizdi. Oǵan Prezidentimizdiń sawǵası «Onix» avtomashinası tapsırıldı. Keyingi orınlardı iyelegenler: 2-orındı alǵan Nókis rayonnıń shabandozına 50 mln. sum, 3-orındı alǵan Qanlıkólli shabandozǵa 30 mln. sum pullay sıylıq hám qımbat bahalı sawǵalar berildi.

7 aylaw boyınsha: 1-orınǵa 30 mln. sum, 2-orınǵa 20 mln. sum, 3-orınǵa 15 mln. sum,   

5 aylaw boyınsha: 1-orınǵa 20 mln. sum, 2-orınǵa 15 mln. sum, 3-orınǵa 10 mln. sum,

5 aylaw jorǵa jónelisi boyınsha: 1-orınǵa 20 mln. sum, 15 mln. sum, 3-orınǵa 10 mln. sum,

3 aylaw boyınsha: 1-orınǵa 10 mln. sum, 2-orınǵa 5 mln. sum, 3-orınǵa pılesos,

1 aylaw boyınsha: 1-orınǵa xolodilnik, 2-orınǵa televizor, 3-orınǵa pılesos tapsırıldı.

Sonday-aq, «Qız quwıw» juplıqları, «Teńge alıw» boyınsha hár bir jeńimpaz, «Kókpar» jarıslarınıń jeńimpazlarınıń hár biri bahalı sawǵalar menen xoshametlendi.

Bayram qatnasıwshılarına diyqanlarımız tárepinen jetistirilgen awıl xojalıǵı ónimleriniń yarmarkası, sheber aspazlarımız tayarlaǵan túrli taǵamlar usınıldı. Kórkem óner sheberleri atqarıwındaǵı koncert baǵdarlaması bayram qatnasıwshılarına ayrıqsha zawıq baǵıshladı. Awıl xojalıǵı xızmetkerleri kúnine baǵıshlanıp ótkerilgen bayram tamashaları xalıq seyili menen dawam etti.