Rekonstrukciyadan shıqqan Xalqabad diyqan bazarı paydalanıwǵa tapsırıldı

Sońǵı jılları elimizde xalqımızdıń abadan turmısın támiyinlew, turmıslıq mashqalalarına sheshim tabıw baǵdarında keń kólemli jumıslar ámelge asırılmaqta. 

Bul baǵdarda Kegeyli rayonında da infrastruktura menen baylanıslı mashqalalardı saplastırıw boyınsha bir qatar ilajlar alıp barılıp, xalıqtı qıynap kelgen máselelerge sheshim tabıw ilajları kórilip atır.

Kegeyli rayonı Xalqabad posyolkasında «Xalqabad diyqan bazarı»nıń ashılıw máresimi ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı jaqınlap qalǵan Jańa jıl bayramı, sonday-aq, «Xalqabad diyqan bazarı»nıń paydalanıwǵa tapsırılıwı múnásibeti menen qutlıqladı.

Atap ótilgenindey, bazar aymaǵında 5,2 mlrd. sum qarjı esabınan rekonstrukciya jumısları alıp barıldı. Satıwshılar hám qarıydarlar ushın qolaylı sharayatlar jaratıw maqsetinde bastırmalı sawda qatarları, jańa dúkanlar qurılıp, diyqan bazarı zamanagóy kóriniske keltirildi. Bazar aymaǵı keńeytilip, kanalizaciya tarmaqları tartıldı hám átirapları abadanlastırıldı. Zamanagóy kameralar ornatılıp, sanlastırıw jumısları alıp barıldı.

Álbette, bul diyqan bazar uzaq jıllar dawamında xalqımız iygiligi jolında xızmet etedi.

Ashılıw saltanatı dawamında miymanlar bazar aymaǵında jaratılǵan sharayatlar menen jaqınnan tanıstı.