«Qaraqalpaqfilm» kinostudiyasında ámelge asırılǵan jumıslar kózden ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev rekonstrukciyadan shıǵarılıp, paydalanıwǵa tapsırılǵan «Qaraqalpaqfilm» kinostudiyasında ámelge asırılǵan jumıslar menen tanısıw maqsetinde usı jerde boldı.

Atap ótiw orınlı, «Qaraqalpaqfilm» kinostudiyası imaratında derlik 6,5 mlrd. sum qarjı esabınan qurılıs-ońlaw jumısları alıp barılıp, zárur texnika hám inventarlar menen támiyinlendi. Sonday-aq, kinostudiyada dawıs jazıw hám dublyaj studiyaları iske tusirildi hám muzey shólkemlestirildi.

Jaratıp berilgen usınday imkaniyatlar tiykarında, búgingi kúnde kinostudiya jumıslarına ayrıqsha pát endirilip, jańa kartinalar ústinde jumıslar baslandı. Usı qatarda ótken jılı ullı klassik shayırımızǵa arnalǵan «Ájiniyaz» kórkem-publicistikalıq filmi súwretke alınǵan bolsa,  búgingi kúnde «Qarabay» komediyalıq filmi, «Muǵallim» filmi, «Men qaraqalpaq xalqınıń da perzentimen» hújjetli filmi, «Gulayım hám qırıq qız» tariyxıy filmleri súwretke alınıp atır. Milliy kinofondımız jıl sayın jańa filmler menen bayıp barmaqta.

Joqarǵı Keńes Baslıǵı barlıq jaratılǵan sharayatlar menen jaqınnan tanıstı. Kinostudiya jámááti menen sáwbetlesti. Aldaǵı waqıtta xalqımızdıń kewlinen orın alatuǵın kóplep filmler jaratılıwı kerek ekenligin atap ótti.

Onda Ózbekstan Respublikası Mádeniyat ministrligi janındaǵı Kinematografiya agentligi direktorı Sh.Rizaev qatnastı