Qaraqalpaqstannıń ekonomikasın bekkemlewge xızmet etiwshi jáne bir kárxana jumıs basladı

Búgin Nókis qalasında jańadan iske túsirilgen «Osten Technologies» kárxanasınıń ashılıw máresimi ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, nuranıy-aqsaqallar, belsendi hayal-qızlar, keń jámiyetshilik wákilleri qatnastı.

Ilajda Joqarǵı Keńes Baslıǵı kárxana ashılıwı múnásibeti menen jıynalǵanlardı qutlıqladı.

Atap ótilgenindey, sońǵı jılları xalqımızdıń abadan turmısın támiyinlew menen baylanıslı kóplegen obektler paydalanıwǵa tapsırılmaqta. Húrmetli Prezidentimizdiń qollap-quwatlawı menen usınday iygilikli islerge salmaqlı úles qosıp atırǵan isbilermenlerimizge jańadan-jańa imkaniyatlar jaratılmaqta.

Iygilikli maqsetler jolında iske túsirilip atırǵan kárxanalar ekonomikamızdıń turaqlılıǵın támiyinlew menen birge, xalıqtıń dáramatların arttırıw hám jańa jumıs orınların jaratıwda ayrıqsha orın iyelemekte.

Jańadan iske túsirilgen «Osten Technologies» kárxanasınıń ashılıwı da mine usı baǵdardaǵı ilajlardan biri esaplanadı.  Joybar bahası 23,5 mln. dollar bolǵan bul kárxananıń tolıq quwatlıqta iske túsiwi menen jılına 640 mıń metr radiator ónimlerin islep shıǵarıw jolǵa qoyıladı hám jaratılǵan jumıs orınları sanı 300 ge jetkeriledi.

Álbette, iske túsip atırǵan bul kárxana ele uzaq jıllar dawamında xalqımızdıń iygiligi ushın xızmet etedi.

Ilaj dawamında miymanlar kárxana jumısları menen jaqınnan tanıstı.