Nókis qalasında 200 orınlı jańa miymanxana paydalanıwǵa tapsırıldı

Húrmetli Prezidentimiz tárepinen Qaraqalpaqstan ushın óz aldına berilgen jeńillikler hám imkaniyatlar tiykarında Jańa jıl bayramı qarsańında regionımız ushın áhmiyetli obektler paydalanıwǵa tapsırılmaqta.

Usı qatarda búgin paytaxtımızda jańadan qurılıp, paydalanıwǵa tapsırılıp atırǵan «Ramada» miymanxanasınıń ashılıw máresimi ótkerildi.

Onda Qaraqalpaqstan Respublikası Joqarǵı Kenesiniń Baslıǵı Amanbay Orınbaev shıǵıp sóylep, jıynalǵanlardı jańa turizm obekti paydalanıwǵa tapsırılıwı múnásibeti menen qutlıqladı. 

Atap ótiw orınlı, «Karakalpak Palace» jámiyeti tárepinen xalıqaralıq «Ramada by Wyndham» brendi astında 10 mln. dollar qarjı esabınan qurılǵan miymanxana iske túsiwi menen bir waqıttıń ózinde 200 miymandı qabıllaw imkaniyatı jaratıldı. 

Bul jańa turizm obektinde xalqımız ushın, sonday-aq, jergilikli hám sırt elli miymanlar ushın barlıq qolaylı sharayatlar jaratılǵan.

Ótkerilgen ashılıw saltanatı dawamında nuranıy-aqsaqallar hám keń jámiyetshilik wákilleri miymanxanada jaratılǵan sharayatlar menen jaqınnan tanıstı.