Gimnastika orayınıń saltanatlı ashılıw máresimi bolıp ótti

Mámleketimizde barlıq tarawlar qatarında sport tarawına da ayrıqsha itibar qaratılıp, jaslardı sportqa keńnen tartıw, olar arasınan elimiz dańqın dúnyaǵa tanıtatuǵın sportshılardı jetilistirip shıǵarıw jańa basqıshqa kóterilmekte. 

Bul baǵdarda húrmetli Prezidentimizdiń ayrıqsha mehiri hám itibarı menen Qaraqalpaqstanda ámelge asırılıp atırǵan jumıslardı atap ótetuǵın bolsaq, 14 mlrd. sum qarjı tiykarında Nókis Olimpiya hám Paralimpiya orayında qurılıs jumısları alıp barılmaqta. 107 mlrd. sum qarjı esabınan «Turan» futbol stadionında da rekonstrukciya jumısları dawam ettirilmekte. Bunnan tısqarı, búgingi kúnniń ózinde Gúres sheberligi mektebi paydalanıwǵa tapsırıldı.

Mine usınday iygilikli jumıslar qatarında búgin Gimnastika orayınıń ashılıw saltanatı ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, nuranıy-aqsaqallar, belsendi hayallar hám keń jámiyetshilik wákilleri qatnastı.

Ilajda atap ótilgenindey, derlik 80 mlrd. sum qarjı esabınan zamanagóy kóriniste qurıp pitkerilgen bul obektte sportshı jaslar ushın barlıq qolaylı sharayatlar jaratıldı. Obekt inventarlar menen tolıq támiyinlendi. 

Álbette, bul sport orayında elimizdi dúnyaǵa tanıtatuǵın, fizikalıq jaqtan shınıqqan, ayrıqsha uqıplılıǵı menen ajıralıp shıǵatuǵın chempion jaslar jetilisip shıǵadı.