Nókis qalasında 400 jumıs ornına iye jańa kárxana iske túsirildi

Qaraqalpaqstan tariyxında umıtılmas waqıyalarǵa bay túrde ótip atırǵan usı jılda elimiz ekonomikasınıń barlıq tarawlarında úlken ózgerisler hám jańalanıwlar júz bermekte.

Sońǵı jılları húrmetli Prezidentimizdiń qollap-quwatlawı menen Qaraqalpaqstan ushın óz aldına bir qatar párman hám qararlar qabıl etilip, mámleketimizdiń basqa regionlarında bolmaǵan imkaniyatlar hám jeńillikler berildi. Bunday ilajlar isbilermenlikti rawajlandırıw hám keńeytiwge, jańa investiciyalıq joybarlardı iske túsiriwge bekkem tiykar bolıp xızmet etip atır.

Usınday iygilikli jumıslar qatarında búgin Nókis qalasında xalqımızdıń abadan turmısın támiyinlewde áhmiyetli orın tutatuǵın ulıwma bahası 48,5 mln. dollar bolǵan, jılına 18 mıń tonna iyirilgen jip islep shıǵarıw quwatlıǵına iye hám 400 jumıs ornın jaratatuǵın «Nókis SSP Texnopark» kárxanası iske túsiriliwi múnásibeti menen ashılıw saltanatı ótkerildi.

Onda Joqarǵı Keńes Baslıǵı Amanbay Orınbaev shıǵıp sóylep, jıynalǵanlardı jańa kárxana jumıs baslaǵanı múnásibeti menen qutlıqladı. 

Álbette, bul kárxana xalqımız iygiligi jolında elimiz ekonomikasın hám sanaatın rawajlandırıwǵa uzaq jıllar dawamında xızmet etedi.