Joqarǵı Keńes Baslıǵı mádeniyat xızmetkerleri hám din wákilleri menen ushırastı

Usı jıldıń 27-dekabr kúni Qaraqalpaqstan kórkem óner sarayında Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń mádeniyat xızmetkerleri hám din wákilleri menen ushırasıwı ótkerildi. 

Onda Joqarǵı Keńes Baslıǵı shıǵıp sóylep, sońǵı jılları elimizde húrmetli Prezidentimiz basshılıǵında tek ǵana Qaraqalpaqstan ushın óz aldına qabıl etilgen qarar, pármanlar, usı hújjetler arqalı berilgen jeńillikler haqqında keń túrde atap ótti. Ushırasıwda sonday-aq, ótken qısqa waqıt ishinde Qaraqalpaqstan tariyxı betlerinde ózine tán orın alǵan áhmiyetli jańalıqlar, búgingi kúnde ámelge asırılıp atırǵan keń kólemli iygilikli jumıslar, aldaǵı wazıypalar haqqında keń túrde sóz etildi.

Sonı da ayrıqsha aytıw kerek, jaqın qısqa waqıt ishinde Qaraqalpaqstanda shın mánisinde tariyxıy waqıyalar júz berdi. Tek ǵana Qaraqalpaqstan xalqı, isbilermenleri, xalıqtıń barlıq kategoriyaları ushın aldın bolmaǵan jeńillikler, kóplegen imkaniyatlar jaratıp berildi.

Ótkerilgen ushırasıwda barlıq iygilikli isler, turmıslıq reformalar, áhmiyetli baslamalar anıq mısallar menen kórsetip berildi.

Bunnan soń, qatnasıwshılardıń usınıs hám pikirleri tıńlanıp, aldaǵı ámelge asırılıwı tiyis wazıypalar belgilep alındı.

Ushırasıw dawamında búgingi kúnde elimizdiń rawajlanıwı jolında múnásip úles qosıp atırǵan bir topar jámiyet belsendileri múnásip xoshametlendi.