Qaraqalpaqstan Respublikası Joqarǵı Keńesiniń toǵızınshı sessiyası haqqında málimleme

Usı jıldıń 29-dekabr kúni Qaraqalpaqstan Respublikası Joqarǵı Keńesiniń toǵızınshı sessiyası bolıp ótti. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı.

Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı.

Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı.

Sessiya «Qaraqalpaqstan» telekanalı arqalı tuwrıdan-tuwrı efirde jarıtıp barıldı.

Sessiyada dáslep, Joqarǵı Keńes Baslıǵı sońǵı jıllarda húrmetli Prezidentimizdiń Qaraqalpaqstanǵa bolǵan ayrıqsha itibarı menen ámelge asırılǵan keń kólemli dóretiwshilik jumıslarǵa keń túrde toqtaldı.

Atap ótilgenindey, juwmaqlanıp atırǵan 2025-jılda barlıq tarawlarda jańalanıwlar hám ózgerisler júz berip, qala hám rayonlarımızda, hátteki eń shetki aymaqlarda da keń kólemli dóretiwshilik jumıslar ámelge asırılmaqta. Álbette, bunda húrmetli Prezidentimiz tárepinen tek ǵana Qaraqalpaqstan ushın qabıl etilgen 25 ten aslam párman hám qararları áhmiyetli orın tutadı.

Sessiyada usınday jaratıp berilgen imkaniyatlar tiykarında jańadan iske túsken kárxanalar, ámelge asırılǵan joybarlar haqqında keń túrde sóz etildi.

Sonday-aq, Joqarǵı Keńes Baslıǵı usınday keń imkaniyatlardıń jaratılıp beriliwi arqalı kelesi 2026-jılda ámelge asırılıwı tiyis baslı maqsetlerge erisiw boyınsha anıq rejeler belgilep alınǵanlıǵın atap ótti.

Sessiyanıń kún tártibindegi dáslepki másele, Qaraqalpaqstan Respublikasınıń 2026-jılǵı jergilikli byudjetin tastıyıqlaw tuwralı bolıp, bul másele boyınsha Ekonomika hám finans ministriniń orınbasarı M.Bekchanov bayanat jasadı.

Húrmetli Prezidentimiz tárepinen belgilep berilgen wazıypalar hám turmısqa engizilip atırǵan reformalar nátiyjesinde 2025-jıldıń juwmaǵı menen, Jalpı Aymaqlıq Ónim kólemi ótken jıldıń sáykes dáwirine salıstırǵanda 105,9 procentke ósiwi kútilmekte. Usı jılı Qaraqalpaqstan Respublikası jergilikli byudjet dáramatları 100,1 procentke orınlanıwı kútilmekte.

Sessiyada makroekonomikalıq kórsetkishler prognozı hám salıq jáne byudjet siyasatınıń tiykarǵı baǵdarları haqqında maǵlıwmat berildi.
2026-jılda jalpı aymaqlıq ónimlerdiń kóleminiń ósiw pátin ótken dáwirge salıstırǵanda 6,2 procentke, 2030-jılǵa kelip 6,0 procentke jetkeriw rejelestirilmekte. 

Sessiyada Ózbekstan Respublikası esap palatasınıń jetekshi inspektorı E.Saparov bayanat jasadı.

Kún tártibindegi másele tolıq qarap shıǵıldı hám deputatlar tárepinen tiyisli qarar qabıl etildi.
Sessiya kún tártibindegi keyingi másele «Básekilik haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Byudjet, ekonomikalıq reformalar, investiciyalar hám innovaciya máseleleri komiteti baslıǵı B.Seytnazarov bayanat jasadı. 

Bul másele de tolıq qarap shıǵıldı hám deputatlar tárepinen qarar qabıl etildi.

Kún tártibindegi keyingi másele «Telekommunikaciyalar haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Sociallıq-mádeniy rawajlanıw, jaslar siyasatı hám jámiyetlik birlespeler máseleleri komiteti baslıǵı M.Atamuratov bayanat jasadı.

Bul másele boyınsha deputatlar tárepinen qarar qabıl etildi.

Sessiya kún tártibinde «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı másele boyınsha Joqarǵı Keńestiń Sud-huqıq máseleleri hám korrupciyaǵa qarsı gúresiw komiteti baslıǵı A.Atajanov bayanat jasadı.

Bul másele de tolıq qarap shıǵıldı hám deputatlar tárepinen qarar qabıl etildi.

Sessiyada «Kámbaǵallıqtan abadanlıqqa qaray» baǵdarlaması tiykarında belgilep berilgen wazıypalardıń orınlanıwı boyınsha Qaraqalpaqstan Respublikası Kámbaǵallıqtı qısqartıw hám bántlik ministrligine jiberilgen Parlamentlik sorawınıń nátiyjesi tuwralı másele qarap shıǵıldı. 

Bul másele boyınsha Kámbaǵallıqtı qısqartıw hám bántlik ministri Q.Azerbaev bayanat jasadı hám tolıq qarap shıǵılıp, deputatlar tárepinen qarar qabıl etildi.

Sessiyada Qaraqalpaqstan Respublikası aymaǵındaǵı ulıwma paydalanıwdaǵı avtomobil hám ishki jollardı hámde kópirlerdi ońlaw baǵdarında alıp barılıp atırǵan ilajlardıń barısı boyınsha Avtomobil jolları bas basqarmasına parlamentlik soraw jiberiw tuwralı másele boyınsha Joqarǵı Keńestiń Sanaat, qurılıs, transport hám málimleme texnologiyaları máseleleri komiteti baslıǵı I.Sdikov bayanat jasadı.

Bul másele de tolıq qarap shıǵıldı hám deputatlar tárepinen qarar qabıl etildi.

Kún tártibindegi keyingi másele sheńberinde kommerciyalıq banklerde baǵdarlamalar sheńberinde kredit qarjıları ajıratılıwında hámde fizikalıq hám yuridikalıq shaxslardıń múrájatların,  sonday-aq xızmetkerlerdiń arasında korrupciyanıń aldın alıwǵa qaratılǵan jumıslar boyınsha Oraylıq banktıń Qaraqalpaqstan Respublikası Bas basqarmasına parlamentlik soraw jiberiw tuwralı másele qarap shıǵıldı.

Bul másele boyınsha Joqarǵı Keńestiń komitet baslıǵı B.Seytnazarov bayanat jasadı hám másele qarap shıǵılıp, deputatlar tárepinen qarar qabıl etildi.

Sessiya kún tártibinde ózbasımshalıq penen iyelep alınǵan jer uchastkasına bolǵan ijara huqıqı hámde olarda qurılǵan imaratlar menen obektlerge bolǵan múlk huqıqı tán alınıp atırǵan puqaralardıń dizimin sessiya qararı menen tastıyıqlaw máselesi qarap shıǵıldı. 

Ózbekstan Respublikasınıń arnawlı Nızamın basshılıqqa alıp, ózbasımshalıq penen iyelep alınǵan jer uchastkasına bolǵan ijara huqıqı jánede olarda qurılǵan imaratlar menen obektlerge bolǵan múlk huqıqı tán alınıp atırǵan 385 puqaranıń dizimi sessiya qararı menen tastıyıqlandı.

Sessiya kún tártibinde Qaraqalpaqstan Respublikası Konstituciyalıq baqlaw komitetiniń baslıǵın saylaw haqqındaǵı máseleni qarap shıǵıldı.

Paraxat Aytniyazov Qaraqalpaqstan Respublikası Konstituciyalıq baqlaw komitetiniń baslıǵı lawazımına qayta saylandı.

Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw haqqında bolıp, bul másele de tolıq qarap shıǵıldı.

Bunnan soń deputatlar tárepinen arnawlı qarar qabıl etildi.

Usınıń menen Qaraqalpaqstan Respublikası Joqarǵı Keńesiniń toǵızınshı sessiyası óz jumısın juwmaqladı.