XALQÍMÍZǴA JAŃA JÍL QUTLÍQLAWÍ
Qádirli Watanlaslar!
Áziz doslar!
Sizlerdi kóp milletli xalqımızdıń kewillerine ózgeshe quwanısh, ilham-yosh, úmit hám isenim baǵıshlap, bársheni jáne de úlken dóretiwshilik islerge ruwxlandırıp atırǵan qutlı áyyyam – Jańa jıl bayramı menen qızǵın qutlıqlayman.
Xalqımızdıń pidákerlik miynetleri hám Húrmetli Prezidentimizdiń qollap-quwatlawı menen 2025-jıl Qaraqalpaqstan ushın tabıslarǵa tolı, umıtılmas tariyxıy waqıyalarǵa bay hám bereketli jıl boldı, dep isenim menen ayta alamız.
Ásirese, kóp milletli xalqımız úlken quwanısh penen kútip alǵan tariyxıy waqıya – milliy miyraslarımızdıń saylandı úlgileri bolǵan «Qobız soǵıw hám atqarıwshılıq óneri» hámde Qara úyimiz YUNESKOnıń materiallıq emes mádeniy miyrastı qorǵaw dizimine kirgizilgeni xalqımızda maqtanısh sezimlerin oyattı.
Sonday-aq, izde qalıp baratırǵan jılda xalqımızdıń iygiligi jolında xızmet etetuǵın jańa joybarlardıń ámelge asırılǵanı elimizge shın mánisindegi jańalanıw nápesin alıp kelip, xalqımızdı turmıstan razı etiwge bekkem tiykar bolmaqta.
Atap aytqanda, «ACWA Power» kompaniyası tárepinen Qońırat, Qaraózek hám Beruniy rayonlarında quwatlılıǵı 7,2 mıń mega-vattlıq bahası 8 mlrd. 600 mln. dollar bolǵan gigant samal elektr stanciyalarınıń qurılıs jumısları baslanǵanı, sonnan Qaraózek rayonında 16 samal turbina generatorı qurılıp, iske túskeni – xalqımızdıń hám ekonomikalıq tarmaqlardıń energiya resurslarına bolǵan talabın jaqsılawda áhmiyetli orın tutatuǵın, burın bolmaǵan tariyxıy waqıyalar qatarına kiredi.
Sonıń menen birge, barlıq mámleketlik baǵdarlamalar sheńberinde jámi 900 den aslam obektte derlik 4 trln. sumlıq qurılıs-ońlaw jumısları ámelge asırılmaqta.
Sonıń ishinde Nókis qalasındaǵı suw tazalaw obektinde alıp barılǵan 86,6 mlrd. sumlıq rekonstrukciya jumısları nátiyjesinde quwatlılıǵı sutkasına 60 mıń kub metrden 95 mıń kub metrge jetkerilgen bolsa, Nókis rayonında 263 km ishimlik suw tarmaqları hám obektlerinde 11,4 mln. dollarlıq qurılıs-ońlaw jumısları ámelge asırılıp, xalıqtı taza ishimlik suw menen támiyinlew dárejesi 68,4 procentten 90 procentke jetkerildi.
Bunnan tısqarı, Bozataw rayonında jılına 6 mıń puqara dem alıw hám sawallanıw imkaniyatına iye bolǵan zamanagóy sanatoriya paydalanıwǵa tapsırılǵanın, Nókis qalasında Gimnastika orayı hám Gúres sheberligi mektebi jańadan boy tiklegenin, barlıq sharayatlarǵa iye Ózbekstan mámleketlik konservatoriyası Nókis filialınıń jańa oqıw imaratı hám bir waqıttıń ózinde 1200 abituriyent test sınaqların tapsırıw imkaniyatına iye mámleketlik «Test orayı»nıń qurıp pitkerilgenin xalqımız ayrıqsha quwanısh hám maqtanısh penen tilge almaqta.
Joqarıdaǵılar menen bir qatarda, isbilermenlerge jaratılǵan keń imkaniyatlar nátiyjesinde 2025-jılı investiciya baǵdarlaması sheńberinde ulıwma bahası 8 trln. 300 mlrd. sumlıq 591 kárxana iske túsirilip, 12 mıńnan aslam jańa jumıs orınları jaratıldı.
Sonnan Nókis qalasında jılıtıw radiatorların, iyirilgen jip hám bazalt mineralınan ıssılıq saqlawshı materiallar islep shıǵarıw, Kegeyli rayonında LDSP ónimlerin, Moynaq hám Qońırat rayonlarında duz islep shıǵarıw hám duzdı qayta islew, Xojeli rayonında teriden ayaq kiyim ónimlerin islep shıǵarıw hám balıqshılıqtı rawajlandırıw, Taxtakópir rayonında kóp tarmaqlı sharwashılıq, sút, jún hám un ónimlerin qayta islep shıǵarıw kárxanalarınıń iske túskeni ekonomikamızdı bekkemlewde hám xalqımızdıń abadan turmısın támiyinlewde ayrıqsha orın tutatuǵın iygilikli islerden bolıp tabıladı.
Qalaberse, turizmdi rawajlandırıw baǵdarında Nókis qalasında xalıqaralıq brend astında «Ramada» miymanxanası jumıs baslaǵan bolsa, Taxtakópir rayonında kóp milletli xalqımızdıń milliyligin ózinde jámlegen «Tax-tóbe» etno-awılı paydalanıwǵa tapsırıldı, sonıń menen birge, «Nókis – Aqtaw» aviaqatnawı hám «Nókis – Úrgenish» poezd katnawı jolǵa qoyıldı, bunnan tısqarı, búgingi kúnde Nókis qalasında bahası
78 mln. dollarlıq zamanagóy 5 juldızlı miymanxana, Kongress-xoll kompleksi hám 22 qabatlı 2 turaq jay qurılmaqta.
Álbette, bunday iygilikli islerdi ámelge asırıwda ótken qısqa dáwir ishinde tek ǵana Qaraqalpaqstan ushın qabıl etilgen 25 ten aslam tariyxıy Párman hám qararlardıń tutqan ornı ayrıqsha bolmaqta.
Húrmetli Watanlaslar!
Húrmetli Prezidentimizdiń 2025-jıl 26-dekabr kúni Oliy Majliske hám xalqımızǵa jollaǵan Múrájatında xalqımız táǵdiri hám elimiz keleshegi menen baylanıslı oǵada áhmiyetli máselelerge itibar qaratıp, keshiktiriwge bolmaytuǵın anıq wazıypalardı belgilep berdi hám bul wazıypalar «Máhálleni rawajlandırıw hám jámiyetti ilgeriletiw jılı» dep járiyalanǵan 2026-jılda bárshemizdi ullı islerge baslawına isenemiz.
Solay eken, jańa jılda da xalqımızdıń turmıs dárejesin bunnan bılay da jaqsılaw, kámbaǵallıqtı qısqartıw, máhállelerdi rawajlandırıw, sociallıq qorǵawǵa mútáj insanlarǵa járdem kórsetiw, jaslardı, hayal-qızlardı qollap-quwatlaw, isbilermenlikti rawajlandırıw sıyaqlı bir qatar máseleler tiykarǵı wazıypalarımızdan bolıp qala beredi.
Sizlerdi jáne bir márte Jańa jıl bayramı menen qızǵın qutlıqlap, bársheńizge bekkem densawlıq, talmas kúsh-ǵayrat hám mol tabıslar tileymen.
Jańa jıl hár bir shańaraqqa amanlıq, bereket hám quwanısh alıp kelgey!
A.ORÍNBAEV,
Qaraqalpaqstan Respublikası
Joqarǵı Keńesiniń Baslıǵı