Saudiya Arabstanı kompaniyası menen Nókis qalasınıń ıssılıq támiynatın rawajlandırıw boyınsha sóylesiwler ótkerildi
Saudiya Arabstanı kompaniyası menen Nókis qalasınıń ıssılıq támiynatın rawajlandırıw boyınsha sóylesiwler ótkerildi
Húrmetli Prezidentimizdiń tapsırmaları tiykarında ámelge asırılıp atırǵan tiykarǵı infrastrukturalıq joybarlar sheńberinde búgin Qaraqalpaqstan Respublikası Ministrler Keńesiniń Baslıǵı F.Ermanov hám Saudiya Arabstanınıń iri "Saudi tabreed" kompaniyasınıń bas direktorı Suliman Al-Xlivi qatnasıwında videobaylanıs arqalı ushırasıw bolıp ótti.
Onda tárepler Nókis qalasınıń bar bolģan ıssılıq támiynatı infrastrukturasın modernizaciyalaw, energiya nátiyjeliligin arttırıw jáne zamanagóy hám ekologiyalıq taza texnologiyalardı engiziw máselelerin talqıladı. Sonday-aq, joybar sheńberinde investiciyalardı tartıw, aldınǵı xalıqaralıq tájiriybeni qollanıw hám uzaq múddetli birge islesiwdi jolǵa qoyıw boyınsha pikirlesildi.
Kompaniya bas direktorı Suliman Al-Xlivi óz gezeginde oraylasqan ıssılıq támiynatı tarawında ámelge asırılǵan tabıslı joybarlar tájiriybesi menen bólisip, Nókis qalasında bul baǵdarda perspektivalı joybarlardı ámelge asırıwǵa qızıǵıwshılıq bildirdi.
Ushırasıw juwmaǵında tárepler keleshekte texnikalıq-ekonomikalıq tiykarlardı islep shıǵıw, maman qánigeler dárejesinde sóylesiwlerdi dawam ettiriw boyınsha kelisimge eristi.
