"Aymaqlıq elektr tarmaqları"na xızmet avtotransportları tapsırıldı

Mámleketimizde xalıqtı elektr energiyası menen turaqlı támiyinlew, elektr támiynatı kárxanalarınıń jumıs nátiyjeliligin arttırıw hám xızmet kórsetiw sapasın jaqsılawǵa ayrıqsha itibar qaratılmaqta. Sonday-aq, tarawda jumıs alıp barıp atırǵan xızmetkerlerdi zamanagóy texnika hám transport quralları menen támiyinlew jumısları izbe-iz dawam etpekte.

Usı múnásibet penen Nókis qalasında "Aymaqlıq elektr tarmaqları" akcionerlik jámiyeti Qaraqalpaqstan aymaqlıq filialı ushın satıp alınǵan xızmet avtotransport quralların tapsırıw máresimi bolıp ótti.

Ilajda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanov hám Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov qatnastı.

Ilaj dawamında aymaqlıq filial qaramaǵındaǵı qala hám rayon elektr támiynatı bólimleri ushın júk-jolawshı tasıwǵa mólsherlengen 30 zamanagóy «Changan» elektromobiller tapsırıldı. 

Bul transport quralları elektr tarmaqlarında profilaktikalıq qadaǵalaw jumısların alıp barıw, avariyalıq jaǵdaylarǵa operativ jetip barıw hám xızmet kórsetiw processleriniń nátiyjeliligin arttırıwǵa xızmet etedi.