Prokuratura organları xızmetkerleri kúni keń túrde belgilendi

Búgin Berdaq atındaǵı Qaraqalpaq mámleketlik akademiyalıq muzıkalı teatrında «Ózbekstan Respublikası Prokuraturası organları xızmetkerleri kúni» múnásibeti menen saltanatlı ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, kásiplik bayramı múnásibeti menen taraw pidayıları hám veteranların qutlıqladı.

Atap ótilgenindey, elimizde húrmetli Prezidentimizdiń basshılıǵında xalqımızdıń tınıshlıǵın hám abadan turmısın támiyinlew, aymaqlardı sociallıq-ekonomikalıq rawajlandırıw, jınayatshılıq hám huqıqbuzarlıqqa, sonday-aq, korrupciyaǵa qarsı gúresiw, nızam ústemligin támiyinlewde ayrıqsha orınǵa iye prokuratura organlarınıń jumıs nátiyjeliligin jáne de arttırıw baǵdarında keń kólemli jumıslar ámelge asırılmaqta.

Álbette, bunday ilajlar nátiyjesinde eń tiykarǵı baylıǵımız esaplanǵan tınıshlıq hám milletler aralıq doslıqtı saqlaw, puqaralardıń erkinligi hám nızamlı máplerin qorǵaw, jınayatshılıq hám huqıqbuzarlıqlardıń aldın alıw, isbilermenlerdi qollap-quwatlaw hám basqa da xalıq iygiligi jolında ámelge asırılıp atırǵan jumıslarda taraw wákilleri pidákerli jumıs alıp barmaqta.

Búgingi ótkerilgen ilajda mine usınday joqarı pazıyletli jumıslar keń túrde sóz etildi. Sonday-aq, bir topar taraw wákilleri hám veteranları Qaraqalpaqstan Respublikası Joqarǵı Keńesi Prezidiumı qararı tiykarında húrmetli ataq, kókirek belgileri hám «Húrmet jarlıǵı» menen sıylıqlandı. 

Sonday-aq, Ózbekstan Respublikası Bas Prokurorı buyrıǵına tiykar bir topar qatardaǵı xızmetshiler arnawlı shenler, bahalı sawǵalar menen xoshametlendi.

Ilaj dawamında «Prokurordıń bir kúni» sahnalıq shıǵarması jıynalǵanlar názerine usınıldı.