Basshı hám jaslar ushırasıwı ótkerildi

Sońǵı jılları jaslarǵa qaratılıp atırǵan itibar mámleketlik siyasattıń baslı baǵdarlarınıń birine aylanıp, usı tiykarda olardıń óz qabiletin júzege shıǵarıwı, tereń bilim iyelewi, ozıq oylı hám ana Watanımızǵa sadıq xızmet etetuǵın pidayı insanlar bolıp kamalǵa keliwine barlıq imkaniyatlar jaratılmaqta. Bul baǵdarda orınlarda basshı hám jaslar ushırasıwları shólkemlestirilip, olardıń tilek-ótinishlerin tıńlaw jumısları sistemalı túrde jolǵa qoyılǵan.

Usınday ushırasıwlar qatarında Nókis qalasındaǵı Aq quw kompleksinde Ózbekstan Respublikası Ishki isler ministri general-leytenant Aziz Tashpulatovtıń Qaraqalpaqstanlı jaslar menen ushırasıwı ótkerildi. 

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, húrmetli Prezidentimizdiń Qaraqalpaqstanǵa sonıń ishinde, Qaraqalpaqstanlı jaslarǵa bolǵan ayrıqsha itibarı haqqında keń túrde atap ótti.

Ashıq-aydın pikirlesiw usılında ótkerilgen ushırasıwda jaslar elimizdiń rawajlanıwı jolında xızmet etetuǵın bir qatar jańa ideyaları hám baslamaların bildirdi. Óz náwbetinde, barlıq pikirler esapqa alınıp, kóterilgen mashqalalarǵa ornında sheshimin tabıw ilajları kórildi hám jaslardıń barlıq baslamaları qollap-quwatlanatuǵınlıǵı ayrıqsha tilge alındı. 

Ótkerilgen ushırasıw dawamında elimizde huqıqbuzarlıqtıń aldın alıw baǵdarında belsendilik kórsetip atırǵan bir qatar jaslar múnásip xoshametlendi.