Nókis qalasınıń kanalizaciya tarmaqların jańalaw arqalı xalıqtı qıynap kelgen mashqala óz sheshimin tabadı

Búgin Nókis qalasınıń kanalizaciya tarmaqların qurıw hám rekonstrukciyalaw jumıslarına start beriliwi múnásibeti menen saltanatlı ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı xalqımız turmısında áhmiyetli orın tutatuǵın waqıyalardan biri bolǵan jańa joybar baslanıwı múnásibeti menen qutlıqladı.

Atap ótilgenindey, sońǵı jılları húrmetli Prezidentimizdiń basshılıǵında xalıqtıń kewil-keypiyatına tikkeley tásir etiwshi infrastruktura obektlerin qurıw baǵdarındaǵı ilajlar jańa basqıshlarǵa kóterilmekte. Mine usınday iygilikli ilajlardıń dawamı sıpatında húrmetli Prezidentimizdiń tapsırması menen qabıl etilgen Ministrler Kabinetiniń 486-sanlı qararı tiykarında «Jáhán banki»niń 78 mln. dollar qarjıları esabınan Nókis qalası, Taqıyatas hám Xojeli rayonlarında 286 km kanalizaciya tarmaqları hám obektlerinde qurılıs jumısların alıp barıw názerde tutılǵan.

Aytıp ótiw orınlı, bunnan derlik 50-60 jıl aldın qurılǵan kanalizaciya tarmaqları eskirip, búgingi kún talabına juwap bermey atırǵanı kópshiliktiń kewil-keypiyatına keri tásir kórsetip kelgen. 

Búgin Nókis qalasınıń kanalizaciyasın jańalaw maqsetinde baslanıp atırǵan joybar sheńberinde 193,5 km kanaliciya tarmaqları hám 25 nasos stanciyasınıń qurılıs jumısları baslanbaqta. Bul joybar juwmaǵına jetkeriliwi menen qalamız xalqınıń kanalizaciya támiynatı 27,6 procentten 46 procentke jetkeriledi.

Sonday-aq, kanalizaciya tarmaqlarınan jıynalǵan suwlar qayta islew arqalı texnikalıq hám xojalıq maqsetlerinde paydalanıw ushın jaramlı suwǵa aylandırıladı hám puqaralardıń qıytaq jerlerine jetkerip beriw jolǵa qoyıladı. 

Jaqın kúnler ishinde Xojeli hám Taqıyatas rayonlarında da usı qarar sheńberinde kanalizaciya tarmaqların jańalaw jumısları baslanadı.