Bozataw rayonında xalıqtıń turmıs jaǵdayın jaqsılaw baǵdarında ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev xalıqtıń abadan turmısın támiyinlew hám isbilermenlikti rawajlandırıw baǵdarında ámelge asırılǵan jumıslar menen tanısıw maqsetinde Bozataw rayonına bardı.

Dáslep, «Erkindárya» awıl puqaralar jıyınında intensiv baǵ jaratıw joybarı sonday-aq, «Qusxanataw» APJdaǵı toǵay xojalıǵınıń nál jetistiriw pitomnigi kózden ótkerildi.

Bunnan soń Joqarǵı Keńes Baslıǵı Bozataw sanatoriyasında xalıqtı sawallandırıw baǵdarında kórsetilip atırǵan xızmetler menen jaqınnan tanıstı hám sanatoriya imkaniyatlarınan tolıq paydalanıw boyınsha juwapkerlerge tiyisli tapsırmalar berdi.

Rayonda ámelge asırılıp atırǵan jumıslar menen tanısıw barısında «Bozataw» posyolkasındaǵı «Bozataw tekstil» kárxanası tárepinen tigiw hám trikotaj ónimlerin islep shıǵarıw sonday-aq, «Kenjebek Dáwletyar» JShJ tárepinen xızmet kórsetiw hám ulıwma awqatlanıw orayın shólkemlestiriw, bunnan tısqarı, isbilermenler ushın zárúr infrastruktura jaratıw arqalı sawda hám xızmet kórsetiw obektlerin iske túsiriw joybarları úyrenildi. Isbilermenlerdiń óz jumısın rawajlandırıwı ushın jaqınnan járdem beriw boyınsha juwapkerlerge anıq tapsırmalar berildi.

Berdaq gúzarı boyında jańadan qurılıp atırǵan kóp qabatlı turaq jaydıń qurılısı barısı da kózden ótkerilip, jumıslardı sapalı etip, óz waqtında orınlaw boyınsha anıq wazıypalar tapsırıldı.

«Erkindárya» APJdaǵı mektepke shekemgi bilimlendiriw shólkeminiń jılıtıw sisteması jumısları da kórip shıǵıldı.

Bunnan soń, máhálle hám awıllarda xalıqtıń turmıs jaǵdayı menen baylanıslı ele de sheshimin kútip turǵan máselelerdi belgilep alıw boyınsha nuranıylar hám kóshe biyleri menen pikirlesildi.