Bozataw rayonın sociallıq-ekonomikalıq jaqtan rawajlandırıw máseleleri kórip shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonın sociallıq-ekonomikalıq jaqtan rawajlandırıw máselelerine arnalǵan májilis ótkerdi.

Onda xalıqtıń turmıs sharayatın jaqsılaw baǵdarında ámelge asırılıwı tiyis jumıslar, kámbaǵallıqtı qısqartıw, xalıqtıń bántligin támiyinlew hámde investiciyalıq joybarlardı ámelge asırıw baǵdarındaǵı berilgen tapsırmalardıń orınlanıwı barısı sın kóz-qarasta qarap shıǵıldı.

Orınlardaǵı máselelerdi sheshiw boyınsha barlıq imkaniyatlar bar ekenligi, húrmetli Prezidentimiz tárepinen zarúr múmkinshilikler jaratıp berilgenligi biraq, ayırım orınlarda artta qalıwshılıqlarǵa jol qoyılıp atırǵanlıǵı sınǵa alındı.

Atap aytqanda, xalıqtıń tikkeley kewil-keypiyatına tásir etiwshi mashqalalardı sheshiw baǵdarında ishki jollardı ońlaw, awır máhállelerdi abadanlastırıw, qurılıs tarawı, kámbaǵallıq reestrine kirgizilgen shańaraqlar menen islesiw sıyaqlı bir qatar máselelerde kemshiliklerge jol qoyılmaqta. Májiliste usı sıyaqlı mashqalalar, jol qoyılǵan kemshilikler kórsetip berildi.

Ótkerilgen májilis dawamında tez pursatta isleniwi tiyis wazıypalar belgilenip, anıq tapsırmalar berildi hám óz wazıypasın orınlawda kemshiliklerge jol qoyǵanı ushın 5 lawazımlı shaxstıń lawazımına ılayıqlıǵı máselesin kórip shıǵıw tapsırıldı. Sonday-aq, 6 lawazımlı shaxsqa intizamiy jaza sharası qollanıldı.