Shıǵındılardı qayta islew baǵdarında áhmiyetli jańa zavod qurılısınıń irge tası qoyıldı

Prezidentimizdiń Qaraqalpaqstanǵa bolǵan ayrıqsha itibarı nátiyjesinde búgin Nókis rayonında jańadan qurılıwı aldında turǵan jáne bir iri zavodqa irge tasın qoyıw máresimi ótkerildi.

Ilajda ekologiya tarawı belsendileri, nuranıylar, keń jámiyetshilik wákilleri qatnastı.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, jıynalǵanlardı turmıslıq shıǵındılardı qayta islew baǵdarında áhmiyetli orın tutatuǵın jańa zavod qurılısınıń irge tası qoyılıwı múnásibeti menen qutlıqladı. 

Atap ótilgenindey, qıtaylı investorlar tárepinen shıǵındını jaǵıw arqalı elektr energiyasın islep shıǵarıwǵa qaratılǵan, shıǵındılardı qayta islew baǵdarında áhmiyetli joybarlardıń biri bolǵan bul zavodtı 80 mln. dollar qarjılar esabınan iske túsiriw arqalı jılına 274 mıń tonna qattı turmıslıq shıǵındılar qayta islenedi. Bunnan tısqarı, 80 mıń Megavatt/saat elektr energiyasın islep shıǵarıw jolǵa qoyıladı.

Sonday-aq, usınday ilajlar alıp barılıwı nátiyjesinde respublikamızda dáslepki márte shıǵındılardı jıynaw, zıyansızlandırıw, qayta islew hám olardı utilizaciyalaw baǵdarında arnawlı ekosanaat zonası shólkemlestiriledi. 

Álbette, ekologiyalıq ortalıqtı jaqsılaw, turmıslıq shıǵındılar hám óndiris shıǵındılarınıń átirapqa unamsız tásirin kemeytiw baǵdarındaǵı bunday joybarlar xalqımız iygiligi jolında uzaq jıllar dawamında xızmet etedi.