Kegeyli rayonında xalıqtıń turmıs jaǵdayın jaqsılaw baǵdarında ámelge asırılıp atırǵan jumıslar kózden ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev «Júzim baǵ» APJ aymaǵında 5 gektar maydanda Bantlikke kómeklesiw fondı qarjıları esabınan  jańadan qurılıp atırǵan  «KEGEYLI GREEN HOUSE» teplicası qurılıs  jumısları menen tanıstı.

Bunnan soń, «Baxıtlı» MPJ aymaǵındaǵı imaratta jaslardı shet tillerge oqıtıw hám jańadan shólkemlestirilgen «IT-Oray» ınıń jumısları sonday-aq, Xalqabad posyolkasındaǵı emlewxanada jaratılǵan sharayatlar kózden ótkerildi.

«Iyshan qala» MPJ aymaǵındaǵı kishi sanaat zonasında ámelge asırılıwı belgilengen joybarlar barısı da kórip shıǵılıp, juwapkerlerge isbilermenlerdi qollap-quwatlaw boyınsha anıq tapsırmalar berildi. 

Sonday-aq, Joqarǵı Keńes Baslıǵı xalıq ushın mádeniy dem alıw orınların shólkemlestiriw baǵdarında «Jılwan jap» MPJ aymaǵında «Zarbdor tájiriybesi» tiykarında kanal boyında dem alıw ornın shólkemlestiriw joybarı, «Nurlı-bostan» MPJ aymaǵında dem alıw ornı hám jańa xızmet kórsetiwshi subektlerdi shólkemlestiriw joybarı menen jaqınnan tanıstı. 

Rayonda ámelge asırılıp atırǵan qurılıs jumısları, atap aytqanda, «Jańa Ózbekstan» massivindegi kóp qabatlı jaylardı qurıw, sonday-aq, «Xalqabad» posyolkasındaǵı kóp qabatlı jaylar ushın kanalizaciya tarmaqların qurıw jumısları kórip shıǵılıp, qurılıs jumısların óz waqtında, sapalı etip pitkeriw boyınsha juwapkerlerge anıq tapsırmalar berildi.

Bunnan soń, máhállelerdegi infrastruktura menen baylanıslı mashqalalardı sheshiw baǵdarında hár birine 3 mlrd .sumnan ajıratılǵan «Jańabazar» hám «Abat» awıl puqaralar jıyınları puqaraları menen jaqınnan pikirlesilip, ajıratılǵan qarjılardı óz ornında isletiliwin qadaǵalawda máhálleniń nuranıy-aqsaqalları, jası úlkenleri belsendi qanasıwı kerek ekenligi atap ótildi.