Shımbay rayonında jańa joybarlar kórip shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shımbay rayonında ámelge asırılıp atırǵan jumıslar menen tanıstı.

Dáslep, Joqarǵı Keńes Baslıǵı «Shaxtemir» máhállesindegi jańadan qurılıp atırǵan sport kompleksi, sonday-aq, usı orında isbilermen baslaması menen jańadan shólkemlestirilip atırǵan «Óserbay Shabandoz» at sportı klubı qurılıs jumısların kózden ótkerdi. Qurılıs jumısların sapalı etip juwmaqlaw, sonday-aq, isbilermenniń joybarın tolıq iske túsiriwi ushın barlıq járdemlerdi kórsetiw boyınsha juwapkerlerge anıq tapsırmalar berildi. 

Bunnan soń, «Zang tex» kárxanası tárepinen iyirilgen jip islep shıǵarıw joybarı jumısları kórip shıǵılıp, ónimlerdiń eksport potencialın arttırıw boyınsha isbilermen menen jaqınnan birge islesiw kerek ekenligi atap ótildi.

«Kókshi qala» máhállesi aymaǵında jaylasqan kárxana ulıwma 199,2 mlrd. sum qarjı tiykarında iske túsirilip atırǵan bolıp, jılına 4 mıń tonnadan artıq, ulıwma 80 mlrd. sumlıq ónim islep shıǵarıw quwatlılıǵına iye. Kárxana tolıq quwatlıqta iske túsiriliwi menen 300 jumıs ornı jaratıladı hám jergilikli turǵınlardıń bántligi támiyinlenedi.

Joqarǵı Keńes Baslıǵı juwapkerlerge búgingi kúnde húrmetli Prezidentimizdiń Qaraqalpaqstanǵa bolǵan ayrıqsha itibarı menen jaratılǵan imkaniyatlardan nátiyjeli paydalanıp, rayonda isbilermenlerdiń sanın arttırıw, jańa óndiris kárxanaların ashıw kerek ekenligin ayrıqsha atap ótti.