«Jaslıq» posyolkası puqaraları menen ushırasıw ótkerildi

«Insan qádiri ushın» principi tiykarında ámeliy jumıslar búgingi kúnniń baslı maqsetine aylanıp úlgergen. Usı tiykarda puqaralardıń mashqalalarına sheshim tabıw boyınsha respublikamızda da bir qatar jumıslar alıp barılıp, bul baǵdarda alıs, shetki aymaqlar turǵınları da itibardan shette qalmay atır. 

Usınday ámeliy ilajlardıń dawamı sıpatında búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdıń eń shetki aymaqlarınan biri bolǵan «Jaslıq» posyolkası puqaraları menen ushırastı. 

Ótkerilgen ushırasıwda aymaq turǵınlarınıń mashqalaları tıńlanıp, ornında sheshimin tabıw ilajları kórildi. Juwapkerlerge waqıt talap etiletuǵın máseleler boyınsha anıq tapsırmalar berilip, hár bir kóterilgen usınıs belgilep alındı.

Atap ótiw orınlı, húrmetli Prezidentimizdiń arnawlı qararı tiykarında «Jaslıq» posyolka puqaralar jıyınına da «Jańa Ózbekstan kelbetindegi máhálle» statusı berilip, 5 mlrd. sum qarjı tiykarında posyolkada keń kólemli qurılıs-ońlaw jumısları alıp barılıwı belgilenip, infrastruktura menen baylanıslı mashqalalarǵa sheshim tabılıwı rejelestirilgen.  

Ótkerilgen ushırasıwda aldaǵı wazıypalar hám belgilengen jumıslar haqqında atap ótilip, barlıq mashqalalarǵa basqıshpa-basqısh sheshim tabılıwı ayrıqsha tilge alındı.