Joqarǵı Keńes Baslıǵı Qubla Ústirtte bolıp, awıl xalqı menen ushırastı

Búgingi kúnde elimizde barlıq reformalar xalqımızdıń búgingi turmısınan razı bolıp jasawın támiyinlew jolında ámelge asırılmaqta. Bunda húrmetli Prezidentimiz tárepinen belgilep berilgen wazıypalar, qabıl etilip atırǵan qarar hám pármanlar, ajıratılıp atırǵan qarjılar bekkem tiykar bolıp xızmet etip atır. Álbette, bunday ámeliy ilajlar alıs hám shetki aymaqlarǵa shekem jetip barıp atır desek aljaspaǵan bolamız.

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qońırat rayonınan derlik 200 km. qashıqlıqtaǵı Ústirt tegisligi ústinde jaylasqan Qubla ústirt awılında bolıp, awıl turǵınları menen ushırastı.  

Onda awıl turǵınları tárepinen bildirilgen múrájatlar hám olardıń tilek-ótinishlerine unamlı sheshim tabıw ilajları kórildi.

Atap ótiw orınlı, Joqarǵı Keńes Baslıǵınıń aldınǵı ushırasıwında kóterilgen máselelerdiń basım kópshiligi óz sheshimin tawıp, puqaralardıń mashqalaları sheship berilgen edi. 

Búgingi ushırasıwda da bir qatar áhmiyetli máseleler atap ótildi hám Joqarǵı Keńes Baslıǵı barlıq másele, álbette, sheshimin tabatuǵınlıǵın atap ótti.