Qaraqalpaqstanda Yaponiya miynet bazarı ushın qánige tayarlaytuǵın oray iske qosıladı
Yaponiyanıń "Orange" kompaniyası hám Qaraqalpaq mámleketlik universiteti arasında yapon tili hám kásip-ónerge oqıtıw orayın shólkemlestiriw boyınsha memorandumǵa qol qoyıldı. Bul baslama Qaraqalpaqstan jasları ushın jańa imkaniyatlar esigin ashadı.
Usı jıldıń 16-23-yanvar kúnleri Yaponiyanıń "Joho Venture Cooperative" hám "Orange" kompaniyaları basshılarınıń Ózbekstanǵa saparı shólkemlestirildi. Sapar sheńberinde Ministrler Kabineti janındaǵı Migraciya agentligi hám Berdaq atındaǵı Qaraqalpaq mámleketlik universiteti basshıları menen bir qatar ushırasıwlar ótkerildi.
Sóylesiwler juwmaǵında "Orange" kompaniyası hám Qaraqalpaq mámleketlik universiteti arasında yapon tili hám kásip-ónerge oqıtıw orayın shólkemlestiriw boyınsha memorandumǵa qol qoyıldı. Bul orayda bilimlendiriw procesi biypul tiykarda shólkemlestirilip, oqıtıwǵa Yaponiyadan maman qánige-oqıtıwshılar tartılıwı rejelestirilgen.
