Ellikqala rayonında xalıqtıń turmıs jaǵdayın jaqsılaw baǵdarındaǵı jumıslar úyrenildi

Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov Ellikqala rayonında bolıp, rayonlıq Medicina birlespesiniń jumısı menen jaqınnan tanıstı. 

Xalıqqa kórsetilip atırǵan medicinalıq xızmet sapası, nawqaslar ushın jaratılǵan sharayatlar, biypul dári-dármaqlar menen támiyinleniwi hám bólimlerdegi bar jaǵday hár tárepleme úyrenildi.  

Emlenip atırǵan nawqaslar menen pikirlesilip, olardıń múrájat hám usınısları tıńlandı. Sonday-aq, balalar bóliminde emlenip atırǵan kishkenelerge sawǵalar tapsırılıp, olardıń halınan xabar alındı.

Bunnan soń, Joqarǵı Keńes Baslıǵınıń orınbasarı rayon hákimligi májilisler zalında nuraniylar menen ushırasıp, jaqınnan pikirlesti.

Onda dáslep, búgingi kúnde elimizde húrmetli Prezidentimizdiń basshılıǵında ámelge asırılıp atırǵan keń kólemli dóretiwshilik jumıslar, turmısqa engizilip atırǵan reformalar atap ótildi.

Sonday-aq, ushırasıw dawamında rayondı kompleksli rawajlandırıw, sociallıq tarawdaǵı tiykarǵı wazıypalar, xalıqtıń bántligin hám abadanlıǵın arttırıw, turmıslıq mashqalalarǵa sheshim tabıw máseleleri talqılandı.

Nuraniylar tárepinen bildirilgen hár bir usınıs hám baslamalar belgilep alınıp, olardı ámelge asırıw boyınsha juwapkerlerge tapsırmalar berildi.