«Milliy qadriyatlar atlası» kitabınıń prezentaciyası ótkerildi

Búgin Arqa-Batıs áskeriy okrugınde «Milliy qadriyatlar atlası» kitabınıń prezentaciyasına arnalǵan ilaj ótkerildi. 

Onda Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov shıǵıp sóylep, ruwxıy baylıǵımız hám milliy qadriyatlarımızdı ózinde sáwlelendirgen jańa áhmiyetli kitaptıń xalqımız názerine usınılıp atırǵanı múnásibeti menen jıynalǵanlardı qutlıqladı. 

Atap ótilgenindey, sońǵı jılları húrmetli Prezidentimizdiń basshılıǵında milliy qadriyatlarımızdı qayta tiklew, tariyxıy miyraslarımızdı qásterlep-saqlaw hám keleshek áwladqa jetkeriw baǵdarında keń kólemli ilajlar ámelge asırılmaqta.  

Mine usınday iygilikli jumıslar qatarında milliy qádiriyatlarımızdı ilimiy-metodikalıq jaqtan ulıwmalastırıp, sanlastırıw hám xalqımızǵa jetkeriw ushın Respublikalıq Ruwxıylıq hám aǵartıwshılıq orayı tárepinen alıp barılǵan ilimiy izleniwler nátiyjesinde «Milliy qádiriyatlar atlası» fundamental kitap-albomi tayarlanıp, baspadan shıǵarıldı. Kitap ulıwma segiz jónelisti óz ishine alǵan bolıp, hár bir aymaqtıń ózine tán milliy ózgeshelikleri hám qadriyatları keń túrde sáwlelendirilgen.

Álbette, bul kitaptıń baspadan shıǵarılıwı ana Watanımızdıń ruwxıy brendin dúnyaǵa tanıtıwǵa xızmet etedi.

Ótkerilgen ilaj dawamında kitaptıń mazmun áhmiyetine arnarǵan videorolik, kórkem óner hám mádeniyat xızmetkerleri atqarıwındaǵı koncert baǵdarlaması jıynalǵanlar názerine usınıldı.