Qaraqalpaqstan Respublikası Joqarǵı Keńesi hám Xalıq deputatları qalalıq hám rayonlıq Keńesleri deputatları menen ushırasıw ótkerildi

Usı jıldıń 21-fevral kúni Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń Qaraqalpaqstan Respublikası Joqarǵı Keńesi hám Xalıq deputatları qalalıq-rayonlıq Keńesleri deputatları menen ushırasıwı ótkerildi. 

Onda Joqarǵı Keńes Baslıǵı shıǵıp sóylep, sońǵı jılları elimizde húrmetli Prezidentimizdiń basshılıǵında tek ǵana Qaraqalpaqstan ushın óz aldına qabıl etilgen qarar, pármanlar, usı hújjetler arqalı berilgen jeńillikler haqqında keń túrde atap ótti. Ushırasıwda sonday-aq, ótken qısqa waqıt ishinde Qaraqalpaqstan tariyxı betlerinde ózine tán orın alǵan áhmiyetli jańalıqlar, búgingi kúnde ámelge asırılıp atırǵan keń kólemli iygilikli jumıslar, aldaǵı wazıypalar haqqında keń túrde sóz etildi. 

Atap ótilgenindey, húrmetli Prezidentimizdiń tek ǵana Qaraqalpaqstan ushın 2017-jıldan berli 78 párman hám qararları qabıl etilgen bolsa, házirgi waqıtta 38 hújjettiń orınlanıwı dawam etpekte. Qabıl etilgen tariyxıy hújjetler tiykarında, xalqımızǵa, sonıń ishinde jaslarımızǵa bir qatar qolaylı sharayatlar jaratılǵanı, isbilermenlerimizge burın bolmaǵan kѳplegen jeńillik hám imkaniyatlar berilgeni,  xalıqtıń awırı jeńil, uzaǵı jaqın bolǵanlıǵı, puqaralardı qıynap kiyatırǵan mashqalalarǵa unamlı sheshim tapqanlıǵı mámleketimiz basshısınıń xalqımızǵa bolǵan ayrıqsha itibarı hám mehiriniń kórinisi esaplanadı.

Sonı da ayrıqsha aytıw kerek, ótkerilgen ushırasıwda barlıq iygilikli isler, turmıslıq reformalar, áhmiyetli baslamalar anıq mısallar menen kórsetip berildi. 

Bunnan soń, qatnasıwshılardıń usınıs hám pikirleri tıńlanıp, aldaǵı ámelge asırılıwı tiyis wazıypalar belgilep alındı.

Ushırasıw dawamında búgingi kúnde elimizdiń rawajlanıwı jolında múnásip úles qosıp atırǵan bir topar deputatlar hám jıldıń eń belsendi Xalıq deputatları jergilikli Keńesleri múnásip xoshametlendi.