Beruniy raynında xalıqtıń turmıs jaǵdayın jaqsılaw baǵdarındaǵı jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev jańa jumıs orınların jaratıw, xalıqtıń abadan turmısın támiyinlew baǵdarında Beruniy rayonında ámelge asırlıp atırǵan jumıslar menen tanıstı.

Dáslep, Joqarǵı Keńes Baslıǵı erkin ekonomikalıq zona aymaǵında 3 mln. AQSh dolları muǵdarındaǵı tikkeley investiciya ózlestiriw arqalı iske túsiriliwi rejelestirilgen «JINFING SILK ROAD TRADING» JShJ tárepinen gazablok islep shıǵarıw joybarı sheńberinde ámelge asırılıp atırǵan qurılıs jumısları menen jaqınnan tanıstı.  

Bunnan soń, EEZ aymaǵında jańadan shólkemlestirilip atırǵan «GLOCONITE MINERAL» JShJ tárepinen mineral tógin islep shıǵarıw, «BERUNIY AGROSTAR» JShJ tárepinen granulalanǵan aralas jem islep shıǵarıw, «KONIRAT MINERAL» JShJ tárepinen balıqshılıq, qusshılıq hám sharwa azıqlıǵı ushın qosımshalar islep shıǵarıw joybarları jumısları barısı kózden ótkerildi. Sonday-aq, «Eko Agro kapital» tárepinen sırt elden alıp kelingen násilli tawıqlar tiykarında ámelge asırılǵan máyek jetistiriw joybarı kórip shıǵıldı. Isbilermenlerdiń óz jumısın jolǵa qoyıwı ushın jaqınnan járdem beriw boyınsha juwapkerlerge anıq tapsırmalar berildi.

Húrmetli Prezidentimizdiń arnawlı qararı tiykarında OPEK xalıqaralıq rawajlanıw fondınıń qatnasıwında jańadan qurılǵan «Shımom» máhállesi hám xalıqqa turmıslıq xızmet kórsetiw ornı imaratında jaratılǵan sharayatlar barıp kórildi. Aymaq turǵınları menen pikirlesilip, xalıq iygiligi jolındaǵı ilajlar bunnan-bılay da dawam ettiriletuǵınlıǵı atap ótildi.

«Xorezm» máhállesi aymaǵında bank balansındaǵı bos turǵan imaratta klinika shólkemlestiriw boyınsha iske túsiriliwi belgilengen investiciya joybarı, «ERIZON» JShJ kárxanası tárepinen ámelge asırılıp atırǵan zamanagóy sawda kompleksin shólkemlestiriw joybarı, sonday-aq, «Beruniy tumani tomorqa xizmati» JShJ tárepinen ıssıxana shólkemlestiriw joybarı jumısları da úyrenildi. 

«Ámir Temur» máhállesi aymaǵındaǵı renovaciya baǵdarlaması sheńberinde eskirgen 2 qabatlı 7 jay ornına zamanagóy kóp qabatlı turaq jaylardı qurıw joybarı da barıp kórildi. Qurılıs jumısların talap dárejesinde orınlaw boyınsha tapsırmalar berildi.