Joqarǵı Keńes Baslıǵı bir topar belsendi jaslar menen ushırastı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis qalasında óziniń baslamaları hám startap joybarları menen belsendilik kórsetip atırǵan bir topar jaslar menen ushıastı.

Ótkerilgen ushırasıwda dáslep Joqarǵı Keńes Baslıǵı húrmetli Prezidentimizdiń ayrıqsha itibarı menen jaslarǵa jaratılǵan imkaniyatlar haqqında keń túrde atap ótti. Sonıń menen birge, usınday imkaniyatlardan orınlı paydalanıp, joqarı nátiyjelerge erisip atırǵan jaslar sanı artıp atırǵanı ayrıqsha qanaatlanıwshılıq penen tilge alındı.  

Bunnan soń, jaslardıń bántligin támiyinlew, isbilermenligin jolǵa qoyıw, óz ideyaların júzege shıǵarıwı ushın mámleketimiz basshısı tárepinen jaratıp berilgen imkaniyatlar, ayrıqsha jeńillikler haqqında juwapkerler tárepinen maǵlıwmat berildi.

Óz náwbetinde, jaslar mámleketimiz basshısınıń bunday joqarı isenimi hám jaslarǵa kórsetip atırǵan atalarsha ǵamxorlıǵı ushın tereń minnetdarshılıǵın bildirdi.

Sonday-aq, jaqınnan pikirlesiw tárizinde ótkerilgen ushırasıwda jaslar tárepinen bir qatar áhmiyetli baslamalar kóterildi. Hár bir bildirilgen usınıs belgilep alınıp, bul ideyalardı turmısqa engiziw boyınsha juwapkerlerge anıq tapsırmalar berildi.