Xojeli rayonı kanalizaciya tarmaqların jańalaw jumıslarına start berildi

Búgin Xojeli rayonınıń kanalizaciya tarmaqların qurıw hám rekonstrukciyalaw jumıslarına start beriliwi múnásibeti menen saltanatlı ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı xalqımız turmısında áhmiyetli orın tutatuǵın waqıyalardan biri bolǵan jańa joybar baslanıwı múnásibeti menen qutlıqladı. 

Atap ótilgenindey, sońǵı jılları húrmetli Prezidentimizdiń basshılıǵında elimizdiń barlıq aymaqları qatarında Xojeli rayonında da keń kólemli jumıslar ámelge asırılıp, bir qatar sociallıq hám infrastruktura obektleri qurıldı hám kóplegen óndiris kárxanaları jumıs basladı. Ótken jıllar dawamında rayondaǵı termitten zıyan kórgen 147 úyde jasap atırǵan puqaralardı basqa orınlarǵa kóshiriw ushın 33 mlrd. sum qarjı ajıratılıp, puqaralar jańa úylerge kóshirildi. 

Bunnan tısqarı, Oraylıq Aziyada birinshi márte Xojeli rayonında násilli qaramallardan embrion islep shıǵarıw laboratoriyası iske túsirildi. Ishki hám mámleketlik áhmiyettegi jollardı ońlaw ushın 50 mlrd. sum qarjı ajıratılıwı názerde tutılmaqta.

Mine usınday iygilikli ilajlardıń dawamı sıpatında húrmetli Prezidentimizdiń tapsırması menen «Jáhán banki»niń 78 mln. dollar qarjıları esabınan Nókis qalası, Taqıyatas hám Xojeli rayonlarında 286 km kanalizaciya tarmaqları hám obektlerinde qurılıs jumısların alıp barıw názerde tutılǵan.

Búgin Xojeli rayonı kanalizaciya sistemasın jańalaw maqsetinde baslanıp atırǵan joybar sheńberinde 8 mln. 370 mıń dollar qarjı tiykarında 94 km kanalizaciya tarmaqları hám 5 dana nasos stanciyasınıń qurılıs jumısları alıp barılıwı rejelestirilgen. Bul joybardıń tolıq juwmaqlanıwı nátiyjesinde rayon xalqınıń kanalizaciya támiynatı házirgi 4,5 procentten - 29 procentke jetkeriledi.