Joqarǵı Keńes Baslıǵı Xojeli rayonında jaslar menen ushırastı

Jaqında húrmetli Prezidentimizdiń jaslar menen olardıń baslamaların qollap-quwatlaw boyınsha qosımsha imkaniyatlarǵa arnalǵan sóylesiwi ótkerilgen edi. Ótkerilgen ushırasıw sheńberinde jaslar menen jaqınnan pikirlesilip, olardıń baslamaları qollap-quwatlandı hám usı tiykarda hápteniń hár piyshembi kúni jaslar kúni dep belgilendi.

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Xojeli rayonındaǵı jaslar menen ushırastı. 

Ótkerilgen ushırasıwda dáslep, Joqarǵı Keńes Baslıǵı sońǵı jılları húrmetli Prezidentimizdiń basshılıǵında jaslardı qollap-quwatlaw mámleketlik siyasattıń baslı baǵdarına aylanǵanın atap ótti. Onda sonday-aq, búgingi kúnde talant hám uqıbın júzege shıǵaraman, baslamalarımdı ámelge asıraman degen hár qanday jasqa barlıq imkaniyatlar jaratıp berilgenligi, jaslardıń tilek-ótinishlerin tıńlap, olardıń mashqalalarına sheshim tabıw hár bir basshı aldındaǵı tiykarǵı wazıypalardıń biri ekenligi ayrıqsha tilge alındı.

Atap ótiw orınlı, jaslardıń mashqalalarına sheshim tabıw, olardıń bántligin támiyinlew hám turmıs sharayatın jaqsılaw baǵdarında rayondaǵı hár bir basshı tárepinen bir qatar jaslar atalıqqa alındı. Usı qatarda, Joqarǵı Keńes Baslıǵı da 20 jastı óz atalıǵına alıp, olarǵa jaqınnan járdem beretuǵınlıǵın aytıp ótti.

Ótkerilgen ushırasıw dawamında jaslardıń mashqalaları tıńlanıp, juwapkerlerge barlıq máselelerdi sheship beriw, aldaǵı waqıtta hár bir jas penen tikkeley islesip, olarǵa jaqınnan járdem beriw boyınsha tapsırmalar berildi.

Ushırasıw dawamında jaslardıń bántligin támiyinlew hám óz isbilermenligin jolǵa qoyıwı ushın mámleketimiz tárepinen jaratıp berilgen jeńillikler tanıstırıldı.