Ellikqala rayonında ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ellikqala rayonında jańa jumıs orınların jaratıw, xalıqtıń turmıs jaǵdayın jaqsılaw baǵdarında ámelge asırılıp atırǵan jumıslar menen jaqınnan tanıstı.

Dáslep, Joqarǵı Keńes Baslıǵı «Zarbdor» tájiriybesi tiykarında Aqshakól boyındaǵı turizm rekreacion zonasında ámelge asırılǵan jumıslar menen jaqınnan tanıstı.  

Bunnan soń, «Qabatqala» máhállesi aymaǵında «Bostan Buxgalteriya» JShJ tárepinen qaǵazdı qayta islew arqalı xojalıq qaǵazların islep shıǵarıw, «ELLIKQAL’A OLTIN TOLASI KLASTERI» JShJ tárepinen ámelge asırılıp atırǵan paxtanı qabıl etiw punktin shólkemlestiriw hám tayar trikotaj ónimlerin islep shıǵarıw, «MEDI-UM ENERGY STREAM» JShJniń polietelin trubalar islep shıǵarıw joybarları kózden ótkerildi. Isbilermenlerge jaqınnan járdem beriw, jańa jumıs orınların jaratıwǵa qaratılǵan hár qanday joybarlardı qollap-quwatlaw boyınsha juwapkerlerge anıq tapsırmalar berildi.

Sonday-aq, rayonlıq abadanlastırıw basqarması tárepinen ámelge asırılıp atırǵan jumıslar, jiyde nálin jetistiriw joybarı hám xalıqqa kórsetilip atırǵan pullı xızmetlerdiń barısı úyrenildi. Qosımsha dáramat tabıwǵa qaratılǵan joybarlardı kóbeytiw kerek ekenligi ayrıqsha tilge alındı.

«Nawayı» máhállesindegi «BO'STON STRAUSI» fermer xojalıǵı tárepinen túyequs baǵıw, «Qo‘shqo‘ra» máhállesi aymaǵındaǵı «ISLOM NASL CHORVA» JShJ tárepinen sharwashılıq kompleksin shólkemlestiriw, «Dumanqala» máhállesindegi Madaminov Allabergannıń qıytaq jerinde shólkemlestirilgen nál jetistiriw joybarları kórip shıǵıldı. 

Bunnan soń, «Nawayı» máhállesi aymaǵındaǵı «Boston CHerri» fermer xojalıǵı jer maydanında jańadan jaratılıp atırǵan erik baǵına «Jasıl mákan» joybarı sheńberinde awıl aqsaqalları, nuranıylar menen birge jaqsı niyetler menen miywe nálleri otırǵızıldı.