Jigitler áskeriy xızmetke atlandı

Búgin Nókis qalasınıń orayındaǵı Ózbekstan hám Qaraqalpaqstan Respublikalarınıń mámleketlik bayraqları jaylasqan maydanda múddetli áskeriy xızmetke shaqırılıwshılardı shıǵarıp salıwǵa arnalǵan saltanatlı ilaj bolıp ótti. 

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, bir qatar jaslardıń múddetli áskeriy xızmetti ótewge múnásip dep tabılıp, ana Watan aldındaǵı perzentlik parızın ótew ushın ketip baratırǵanı múnásibeti menen qutlıqladı.  

Aytıp ótiw orınlı, sońǵı jılları Húrmetli Prezidentimiz – Qurallı Kúshlerimiz Joqarı Bas Sárkardası tárepinen elimizdiń qorǵanıw potencialın kúsheytiw, Qurallı Kúshlerimizdi bekkemlew, áskerlerdi hár tárepleme qollap-quwatlaw hám basqa da usı baǵdardaǵı máselelerge úlken itibar qaratılmaqta.

Usınday kólemli ilajlar nátiyjesinde Milliy armiyamız xalqımızdı isenimli qorǵaw menen birge, jas áwladtı mártlik, Watanǵa muhabbat hám sadıqlıq sezimleri menen tárbiyalaytuǵın turmıs mektebine aylanıp, onda hár tárepleme salamat jaslar kamalǵa kelmekte. 

Ótkerilgen ilajda áskeriy orkestr namaları astında Watandı qorǵawǵa atlanǵan jaslarǵa aq jol tilenip, mártler qatarına shıǵarıp salındı.