Joqarǵı Keńes Baslıǵınıń orınbasarı sportshı jaslar menen ushırastı

Búgin Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov sporttıń boks túri menen shuǵıllanıp atırǵan jaslar, olardıń ata-anaları hám trenerleri menen ushırasıw ótkerdi.

Onda dáslep, Joqarǵı Keńes Baslıǵınıń orınbasarı sońǵı jılları húrmetli Prezidentimizdiń basshılıǵı barlıq tarawlar qatarında dene tárbiya hám sporttı rawajlandırıwǵa, jaslardı sportqa keńnen qamtıp alıwǵa, Olimpiya hám milliy sport túrlerin rawajlandırıwǵa ayrıqsha itibar qaratılıp, bul baǵdarda keń kólemli ilajlar ámelge asırılıp atırǵanlıǵın atap ótti.

Sonday-aq, húrmetli Prezidentimiz tárepinen Qaraqalpaqstan ushın óz aldına qabıl etilgen tariyxıy hújjetler xalqımızdıń, sonıń ishinde jaslarımızdıń turmısında úlken ózgerisler júz beriwine tiykar bolıp atırǵanlıǵı ayrıqsha tilge alındı.

Ótkerilgen ushırasıwda sonday-aq, sportshı jaslardıń, olardıń ata-anaları hám trenerleriniń pikir-usınısları tıńlanıp, mashqalalar belgilep alındı hám tez pursatta unamlı sheshim tabıw boyınsha juwapkerlerge tapsırmalar berildi. 

Ilaj dawamında boks boyınsha joqarı nátiyjeler kórsetip atırǵan jaslardıń ata-analarına Qaraqalpaqstan Respublikası Joqarǵı Kenesiniń Minnetdarshılıq xatları tapsırıldı.