IT tarawındaǵı jetekshi hayal-qızlar "Yulduz Tech Awards"da sıylıqlandı

Informaciya texnologiyaları tarawında hayal-qızlardıń qatnasıwı hám jetekshiligi jıl sayın artıp, olar milliy sanlı rawajlanıwdıń áhmiyetli háreketlendiriwshi kúshine aylanıp barmaqta.

Hayal-qızlardıń IT baǵdarındaǵı nátiyjeli jumısın múnásip bahalaw, olardı xoshametlew hám erisken jetiskenliklerin keń jámiyetshilikke tanıstırıw maqsetinde Sanlı texnologiyalar ministrligi tárepinen "Yulduz Tech Awards" sıylıqlaw máresimi ekinshi márte shólkemlestirildi.

Qaraqalpaqstannan Xojamuratova Malika Málimleme texnologiyasındaǵı "Jas juldız", Tóremuratova Biybinaz IT tarawındaǵı "Aldınǵı hayal basshı" belgilerine múnásip dep tabıldı.

Bul abıraylı ilaj eki jıldan berli málimleme texnologiyaları tarawında innovaciyalıq ideyaları, professional jetekshiligi hám joqarı nátiyjeleri menen sanlı keleshekti qurıp atırǵan hayal-qızlardı múnásip xoshametlep kiyatırǵanın atap ótiw kerek.

Ilaj sheńberinde tarawdıń aldınǵı wákilleri sıylıqlandı hám jańa talant hám baslamalar qollap-quwatlandı.