Xalıqaralıq hayal-qızlar bayramı keń túrde belgilendi

Búgin Nókis qalasındaǵı Aq quw kompleksinde "8-mart - Xalıqaralıq hayal-qızlar kúni" múnásibeti menen bayram saltanatı bolıp ótti.

Onda dáslep Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı bayram múnásibeti menen qutlıqladı.

Ilajda Ózbekstan Respublikası Prezidentiniń keńesgóyi T.Xudaybergenov, Ministrler Keńesiniń Baslıǵı F.Ermanov qatnastı.

Bunnan soń, bir topar hayal-qızlardı sıylıqlaw máresimi ótkerilip, elimiz ǵárezsizligin bekkemlew, onıń sociallıq-ekonomikalıq potencialın arttırıwǵa qosqan úlesleri hám jas áwladtı Watanǵa sadıqlıq, ulıwmainsaniylıq qádiriyatlar ruwxında tárbiyalawdaǵı xızmetleri ushın bir topar hayal-qızlarǵa:

«Ardaqlı nuranıy», «Ibratlı hayal», «Watan pidayısı», «Úmit ushqını» kókirek belgileri, Ózbekstan Respublikası Shańaraq hám hayal-qızlar komitetiniń «Mo’tabar ayol» kókirek nıshanı, Ministrler Keńesiniń «Húrmet jarlıǵı» tapsırıldı.

Bayram saltanatı kórkem-óner hám mádeniyat xızmetkerleri atqarıwındaǵı koncert baǵdarlaması menen dawam etti.

Kórkem-óner hám mádeniyat xızmetkerleri atqarıwındaǵı koncert baǵdarlaması menen dawam etken bayram saltanatı qatnasıwshılarǵa joqarı keypiyat bólisti.