IT tarawındaǵı jaslar menen ushırasıw ótkerildi

Húrmetli Prezidentimizdiń tapsırması menen hápteniń hár piyshembi kúni jaslar kúni etip belgilengen edi. Usı tiykarda búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev IT tarawındaǵı jaslar menen ushırastı.

Ótkerilgen ushırasıwda dáslep Joqarǵı Keńes Baslıǵı húrmetli Prezidentimiz basshılıǵında barlıq tarawlar qatarı IT tarawına da ayrıqsha itibar qaratılıp, bul baǵdarda keń kólemli ilajlar ámelge asırılıp atırǵanlıǵına óz aldına toqtaldı.

Atap ótilgenindey, IT tarawı eń az qarjı jumsap, kóp payda alsa bolatuǵın keleshek kásipleriniń biri esaplanadı. Sonlıqtanda, tarawǵa ayrıqsha itibar qaratılıp, keń múmkinshilikler jaratıp berilmekte. Bir ǵana mısal, Tashkent qalasınan basqa mámleketimizdiń birde-bir aymaǵında bolmaǵan 17 etajlı IT-Park imaratı Nókis qalasında qurılıp, búgingi kúnde zeyinli jaslarımız ushın xızmet etpekte. Álbette, jaslar ushın jaratılǵan bunday imkaniyatlar olarǵa bolǵan itibar mámleketlik siyasattıń baslı baǵdarlarınıń birine aylanıp atırǵanlıǵınıń kórinisi esaplanadı.

Búgingi ótkerilgen ushırasıwda da mine usınday iygilikli jumıslar atap ótilip, tarawdı jáne de rawajlandırıw, frilanserlerdi qollap-quwatlaw, IT eksportın ele de arttırıw, startap joybarlardı ámelge asırıw baǵdarında jaslardıń pikir-usınısları tıńlandı.

Óz náwbetinde, jaslar tárepinen bir qatar áhmiyetli baslamalar, jumıs alıp barıw barısında ushırasıp atırǵan máseleler kóterildi.

Hár bir kóterilgen másele Joqarǵı Keńes Baslıǵınıń jeke qadaǵalawına alınıp, taraw juwapkerlerine tez arada unamlı sheshim tabıw boyınsha anıq tapsırmalar berildi.

Ótkerilgen ushırasıw dawamında teńlesleri arasında óziniń umtılıwshańlıǵı hám ayrıqsha belsendiligi menen kópshilikke úlgi bolıp atırǵan bir topar jaslar xoshametlendi.