Joqarǵı Keńes Baslıǵınıń orınbasarı R.Nurazizov Beruniy rayonında túrli tarawlarda jumıs alıp barıp atırǵan hám bilim alıp atırǵan jaslar menen ushırasıp, olardıń múrájatların ornında tıńladı

Dáslep “Xorezm” máhállesi aymaǵında jaylasqan cexta jaslarǵa argon kepserlewdiń sırların úyretip kiyatırǵan Islam Xudaybergenovtıń jumısı kózden ótkerildi.

Bul oqıw cexında oqıw kursların tamamlaǵan jaslar sırt mámleketlerge nızamlı túrde miynet migraciyasına "professional usta" esabında jol almaqta.

Avtomobillerge zamanagóy detayling xızmetin kórsetiw tarawında 100 mln. sum jeńilletilgen kredit esabınan jumısın baslaǵan 24 jasar isbilermen Akmal Ergashev 3 jastı jumıs penen támiyinlegen. Ol búgingi kúnde jumısın keńeytiwdi rejelestirgen.

Bunnan keyin, "Erizon sawda kompleksi"n shólkemlestiriw jumısları úyrenildi. Bul sawda poligonında kewilashar balalar oyın maydanı, sonday-aq, ulıwma awqatlanıw orınları, qurılıs tovarları dúkanları orın alǵan. Ulıwma bahası 1 million AQSh dolları bolǵan zamanagóy sawda imaratında 100 den aslam jaslar turaqlı jumıs penen támiyinlenedi. Úyreniwler dawamında juwapkerlerge jaslardıń isbilermenligin qollap-quwatlaw boyınsha anıq tapsırmalar berildi.

Jaslar menen ushırasıwdıń keyingi mánzili rayondaǵı 6-sanlı balalar muzıka hám kórkem óner mektebi boldı. Joqarǵı Keńes Baslıǵınıń orınbasarı dógereklerdiń jumısı menen tanıstı hám jaslardıń usınısların tıńladı.

Sport mektebinde "Prezident olimpiadası shıńları" sport jarısına tayarlıq kórip atırǵan voleybol saylandı komandasınıń oyınları hám olarǵa jaratılǵan sharayatlar kózden ótkerildi. “Ziyokor” máhállesinde úy sharayatında bilim alıp atırǵan 65-sanlı ulıwma orta bilim beriw mektebi oqıwshısı Surayyo Sultonnazarovaǵa noutbuk sawǵa etildi.

Álbette, jaslardıń mashqalaların úyreniw, olarǵa hár tárepleme járdem beriw búgingi kúnniń tiykarǵı principlerinen birine aylanǵan hám bunday iygilikli jumıslar sistemalı túrde dawam ettiriledi.