Qaraqalpaqstanda gemodializ orayları ashılıw aldında tur

Gemodializ - bul búyrekler óz wazıypasın orınlay almay qalǵanda (ótkir yamasa sozılmalı búyrek jetispewshiligi) qandı apparat járdeminde jasalma tazalaw usılı.

Ol "jasalma búyrek" qurılması arqalı qandaǵı toksinler, mochevina, artıqsha suyıqlıq hám elektrolitlerdi shıǵarıp taslaydı, organizm intoksikaciyasınıń aldın aladı hám ómirdi saqlap qaladı.

Jasalma búyrek qurılmasınan paydalanıw ushın nawqaslarǵa qolaylıq jaratıw maqsetinde mámleketlik – jeke sheriklik tiykarında 500 mıń AQSh dolları investiciya qarjıları esabınan Beruniy hám Qońırat rayonlarında «NEPHROCARE HEALTH SERVICES CENTRAL ASIA» shet el kárxanası JShJ filialın shólkemlestiriw belgilengen edi.

Usı tiykarda respublikamızdıń eki rayonında gemodializ oraylarınıń qurılıs jumısları alıp barılıp, úskeneler ornatılmaqta hám nawqaslar ushın barlıq qolaylı sharayatlar jaratılmaqta.

Tez arada bul eki obyekt xalqımız iygiligi jolında paydalanıwǵa tapsırıladı.