Hayal-qızlar isbilermenligin qollap-quwatlawshı «Hamroh» kompaniyasınıń Qaraqalpaqstan filialı ashıldı
Búgin Nókis qalasında hayal-qızlar isbilermenligin qollap-quwatlaw baǵdarında áhmiyetli esaplanǵan «Hamroh» kompaniyası Qaraqalpaqstan filialınıń ashılıwına arnalǵan ilaj ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ózbekstan Respublikası Prezidenti Adminstraciyası baslıǵınıń konsultantı N.Davletova qatnastı.
Atap ótilgenindey, sońǵı jılları húrmetli Prezidentimizdiń basshılıǵında hayal-qızlardı qollap-quwatlaw mámleketlik siyasattıń baslı baǵdarlarınan birine aylandı. Elimizde olarǵa isbilermenlik baǵdarında kóplegen jeńillikler berilmekte.
Usı qatarda, Prezidentimizdiń 240-sanlı pármanı menen «Hamroh» kompaniyası tárepinen 2026-2027-jıllarda 6 mıń hayal-qızlardıń isbilermenlik joybarların finanslıq qollap-quwatlaw ushın 2 trillion sum qaratıw, 3 mıńǵa jaqın hayal-qızlardı isbilermenlikke oqıtıw hámde 2 mıń hayal-qızdıń isbilermenlik jumısına járdemlesiw belgilengen.
Mine usınday iygilikli jumıslardıń qatarında kompaniya filialınıń ashılıwı hayal-qızlarımızdı isbilermenlikke keńnen tartıwǵa, olardıń óz biznesin ele de rawajlandırıwına kómeklesiwge tiykar bolıp xızmet etedi.
