Qállibek Kamalovtıń tuwılǵanına 100 jıl tolıwı múnásibeti menen iftarlıq dasturxanı jayıldı

Usı jıldıń 18-mart kúni Nókis qalasındaǵı «Aq quw» kompleksinde ataqlı mámleketlik hám jámiyetlik ǵayratker Qállibek Kamalovtıń tuwılǵanına 100 jıl tolıwı múnásibeti menen iftarlıq dasturxanı shólkemlestirildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, ataqlı mámleketlik hám jámiyetlik ǵayratker Qállibek Kamalovtıń tereń bilimi, sheber shólkemlestiriwshilik uqıbı menen elimizdi sociallıq-ekonomikalıq rawajlandırıwǵa qosqan múnásip úlesi haqqında atap ótti.

Iftarlıqta Ózbekstan Respublikası Prezidentiniń keńesgóyi T.Xudaybergenov, Ministrler Keńesiniń Baslıǵı F.Ermanov qatnastı.

Haqıyqatında da, xalqımızdıń búgingidey turmıs sharayatın támiyinlew baǵdarında kóplegen insanlar pidayı xızmet etip, óz ómirin baǵıshlaǵan. Usınday insanlardıń biri sıpatında Qállibek Kamalovtıń pidákerli xızmetlerin kóp milletli xalqımız tereń ańlaydı hám joqarı qádirleydi.

Húrmetli Prezidentimizdiń Qállibek Kamalovqa degen húrmet-izzeti joqarı bolǵanlıǵın bárshemiz jaqsı bilemiz. 

Prezidentimizdiń baslaması menen el ardaǵındaǵı nuranıyımızdıń 100 jıllıǵın keń túrde belgilew boyınsha Ministrler Kabinetiniń arnawlı qararı qabıl etilip, bul boyınsha arnawlı baǵdarlama islep shıǵılmaqta.

Múbárek Ramazan ayında ótkerilgen iftarlıq dasturxanı átirapında Qállibek Kamalovtıń ómiri hám miynet jolı haqqında keń túrde sóz etildi.

Álbette, ol insannıń xalqımız iygiligi jolındaǵı pidákerli xızmetleri xalqımız yadında uzaq saqlanıp qaladı.